चऱ्होलीत मोहरमनिमित्त ताबूत मिरवणूक

चऱ्होली, ता. ७ ः चऱ्होली गावामध्ये मोहरम निमित्त गांधी चौकामधून पारंपरिक पद्धतीने ताबुतांची मिरवणूक काढण्यात आली. त्यामध्ये मुस्लीम बांधवांनी उत्स्फूर्त सहभाग घेत हजरत इमाम हुसेन यांच्या स्मृतींना अभिवादन केले.
मौजे चऱ्होली येथील मुस्लिम बांधव व त्यांच्या पूर्वजांनी ताबूत मिरवणुकीची परंपरा गेली २०० वर्षीपासून जपली आहे. पूर्वी ताबूत ईदगाह मैदानावरील पीरबाबा दर्गावर स्थापन केले जात असत. कालांतराने तो मुलाणी मशिदीमध्ये स्थापन होऊ लागला.
पाटील वाड्यास सलामी दिल्यावर नवनाथ आळी, धर्मनाथ आळी, भोई आळी, माळ आळी, बाजार पेठ मार्गे मिरवणूक काढण्यात आली. मिरवणुकीत माता, भगिनींनी मोठ्या भक्तिभावाने पायावर पाणी टाकून दर्शन घेतात. लहान बाळांना ताबुतांचे दर्शन करविण्यात आले. या मिरवणुकीत ॲड.जालिंदर जोरे, सुनील तापकीर पाटील, सर्जेराव तापकीर, प्रमोद बेल्हेकर, संजय तिकोणे, रामभाऊ पवार, कैलास भोकरे, विजू भोकरे, नंदू दाभाडे, अशोक तापकीर, सुनील चिखले, हेमंत तांबे, डॉ. संजय शेजवळ, राजू ढोरजे यांनी सहभाग घेतला. मिरवणूक भोई आळी येथे येताच सालाबादप्रमाणे सर्व भोई बांधव व प्रतापेश्वर मंडळांच्या कार्यकर्ते ताबूत स्वतःच्या खांद्यावर घेऊन भोई आळी ते बाजारपेठेपर्यंत घेऊन गेले. पोलिस चौकी समोर मुस्लीम बांधवांकडून ग्रामस्थांचे ऋण व्यक्त करण्यात आले. पोलिस चौकीतर्फे शक्तीसिंह तापकीर पाटील यांनी मुस्लिम समाजाचा सन्मान केला. त्यानंतर मिरवणुकीची सांगता झाली.
PNE25V29391