दहशत माजविण्यासाठीच बहुतांश वाहने लक्ष्य

पिंपरी, ता. ७ : शहर परिसरात टोळक्यांकडून सर्वसामान्य नागरिकांच्या वाहनांना लक्ष्य केले जात असून त्यामध्ये
लाखो रुपये किंमतीच्या वाहनांचे नुकसान होत आहे. बहुतांश प्रकार हे खंडणी आणि दहशत माजविण्याच्या उद्देशानेच केल्याचे समोर येत असून काही घटना वैयक्तिक वादातून अथवा लूटमार करताना घडल्या आहेत.
प्रत्येकजण आपले वाहन जिवापाड जपत असतो. शहरात वारंवार घडणाऱ्या घटनांमुळे शहर‌वासीयांत भीती आहे. काही विकृत मंडळी आणि टोळक्यांकडून लाखो रुपये किंमतीच्या वाहनांची नासधूस केली जात आहे. रस्त्यालगत उभ्या वाहनांना टोळक्याकडून प्रामुख्याने लक्ष्य केले जात आहे. मागील काही दिवसांत चिंचवड, भोसरी, चाकण, पिंपरी भागांत अशा घटना घडल्या आहेत. दहशत माजविण्यासह लूटमार, खंडणी या हेतूने या घटना घडल्या. टोळकी त्यांचा राग व्यक्त करण्यासाठी आणि विकृत आनंद मिळविण्यासाठी वाहनांना लक्ष्य करत असले तरी त्यामध्ये सामान्य नागरिकांचे मोठे नुकसान होत आहे. नुकसानग्रस्त वाहन पाहताना वाहन मालक मात्र अक्षरशः सुन्न होत आहेत. या घटना रोखण्यासाठी पोलिसांनी अशा विकृतींना ठेचून नागरिकांमध्ये सुरक्षेची भावना निर्माण होण्यासाठी उपाययोजना राबवाव्यात, अशी मागणी होत आहे.

दिसेल त्या वाहनांची तोडफोड
हातात कोयते, लोखंडी रॉड, दगड घेऊन आरडाओरडा करत दहशत माजवायची. त्यानंतर रस्त्याला दिसेल; ते वाहन लक्ष्य करत तोडफोड करायची. त्यामध्ये, दुचाकी, तीनचाकीसह मोठ्या चारचाकी आलिशान वाहनांचाही समावेश असल्याचे दिसून येते.

वाहन तोडफोडीसारख्या घटना रोखण्यासाठी गस्त वाढवली आहे. मागील काही दिवसांत घडलेल्या घटनेतील आरोपीही ताब्यात घेतलेले आहेत. काही घटनेतील आरोपी अल्पवयीन आहेत. योग्य त्या उपाययोजना राबविल्या जात आहेत.
- डॉ. विशाल हिरे, सहायक पोलिस आयुक्त, गुन्हे शाखा

मागील महिनाभरातील घटना
- १५ जून ः भोसरीतील बालाजीनगर येथे टोळक्याकडून लूटमार करत कोयत्याने मोटारीची तोडफोड
- २१ जून ः चाकण जवळील कडाची वाडीत एकाकडे खंडणीची मागणी करून दांडक्याने मोटारीची तोडफोड
- २६ जून : चिंचवडमधील वाल्हेकरवाडी येथे वाहनांची तोडफोड
- २९ जून ः पिंपरीत टोळक्याकडून तरुणावर प्राणघातक हल्ला करून रस्त्यावरील वाहनांची कोयत्याने तोडफोड
- १ जुलै ः बोपोडी पुलाजवळ चौघांनी दहशत माजवत कोयत्याने रस्त्यावरील वाहनांची तोडफोड