त्रिवेणीनगरमध्ये चोरट्यांनी व्यावसायिकाला लुबाडले

पिंपरी, ता. ७ : हॉर्न वाजविल्याच्या कारणावरुन मोटारीमधील व्यावसायिकाला पिस्तुलाचा धाक दाखवत त्याच्या गळ्यातील सोनसाखळी आणि परवानाप्राप्त पिस्तुल घेऊन तीन जण पसार झाले. त्रिवेणीनगर येथील तळवडे रस्त्यावर हा प्रकार घडला.
या प्रकरणी चिखली पोलिसांनी एका अल्पवयीन मुलाला ताब्यात घेतले असून त्याचे सराईत गुन्हेगार असलेले दोन साथीदार पसार आहेत. विकी विजय भालेकर (वय ३६, रा. ज्योतिबानगर, तळवडे) यांनी चिखली पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी भालेकर यांचा जमीन खरेदी-विक्रीचा व्यवसाय असून त्यांच्याकडे परवाना प्राप्त पिस्तुल आहे. मित्र प्रनिकेत जगताप यांचा मारुंजी येथे वाढदिवस साजरा करून प्रनिकेत आणि अनिकेत चौधरी यांच्यासोबत मोटारीतून घरी येत होते. अनिकेत हे मोटार चालवत होते. तळवडे रस्ता येथे समोरून जाणारी मोटार वेडीवाकडी वळणे घेत जात होती. त्यामुळे अनिकेत यांनी हॉर्न वाजविला. त्यावरून आरोपींनी त्यांची मोटार रस्त्यात आडवी लावली. आरोपींनी त्यांच्याकडील पिस्तुल फिर्यादी विकी यांच्या डोक्याला लावले; तर अनिकेत यांच्या डोक्यात पिस्तुलच्या मुठीने मारहाण केली. एका आरोपीने विकी यांच्या कमरेचे पिस्तुल काढून घेतले. तर एकाने विकी यांच्या गळ्यातील सोनसाखळी हिसकावली.