हिंजवडीतील समस्यांचा मुख्यमंत्री घेणार आढावा

सकाळ इम्पॅक्ट

पिंपरी, ता. ७ : हिंजवडी आयटी पार्कला समस्यांच्या विळख्यातून मुक्त करण्यासाठी मुख्यमंत्री देवेंद्र फडणवीस यांनी सकारात्मक भूमिका घेतली आहे. याबाबत फेडरेशन, स्वयंसेवी संस्था, संबंधित विभागाचे अधिकारी यांची गुरुवारी (ता.१०) दुपारी दोन वाजता ही बैठक घेण्यात येणार आहे.
हिंजवडीतील आयटी पार्कमध्ये वाहतूक कोंडी, पायाभूत सोयी-सुविधांचा अभाव आणि वीज समस्या मांडण्यासाठी ‘अनक्लॉग हिंजवडी’ स्वाक्षरी अभियान राबविण्यात आले. याची दखल घेत मुंबईत विधानभवन येथे ही बैठक होणार आहे.
दरम्यान, हिंजवडी आयटी पार्कच्या समस्यांबाबत ठोस उपाययोजना करण्याबाबत मुख्यमंत्री फडणवीस यांच्या उपस्थितीमध्ये सर्व विभागांच्या अधिकाऱ्यांसह आयटी फोरम व सोसायटी फेडरेशनच्या प्रतिनिधींची बैठक घ्यावी, अशी मागणी आमदार महेश लांडगे यांनी केली होती. याची दखल घेत मुख्यमंत्र्यांनी या बैठकीचे नियोजन केले असून आयटीयन्स आणि सोसायटी फेडरेशनच्या प्रतिनिधींना बाजू मांडता येणार आहे. दरम्यान, ‘सकाळ’नेही वृत्तांच्या माध्यमातून हिंजवडीतील समस्यांवर भाष्य केले होते.

‘हिंजवडी आयटी पार्कमध्ये सुमारे ५ लाख आयटी कर्मचारी नियमित ये-जा करतात. त्यामुळे वाहतूक कोंडीची मोठी समस्या आहे. तसेच, एमआयडीसी, जिल्हा परिषद, पीएमआरडीए, महापालिका, राष्ट्रीय महामार्ग प्राधिकरण अशा विविध विभागांमध्ये सक्षम समन्वय नाही. त्यामुळे पायाभूत सोयी-सुविधांचा प्रश्न निर्माण झाला आहे. त्यामुळे मुख्यमंत्री देवेंद्र फडणवीस यांनी ‘ॲक्शन प्लॅन’ तयार करावा, अशी विनंती केली आहे. त्याबाबत बैठकीमध्ये निश्चितपणे ठोस निर्णय होईल, असा विश्वास आहे.
- महेश लांडगे, आमदार