कामगार संघटनांचा उद्या देशव्यापी संप

पिंपरी, ता. ७ : केंद्र व राज्य सरकारच्या खासगीकरण, कामगारविरोधी धोरणांचा स्वतंत्र मजदूर युनियनने तीव्र निषेध व्यक्त करत बुधवारी (ता.९) देशव्यापी संपात सहभागी होणार असल्याची घोषणा केली आहे. युनियनच्या राष्ट्रीय अध्यक्ष जे.एस. पाटील यांच्या अध्यक्षतेखाली १६ जून रोजी झालेल्या बैठकीत सर्वानुमते हा निर्णय घेण्यात आला. त्यामध्ये शहरातील सर्व पदाधिकारी सहभागी होणार असल्‍याची माहिती स्वतंत्र मजदूर युनियनचे राष्ट्रीय उपाध्यक्ष नरेंद्र जारोंडे, राज्‍य मागासवर्गीय विद्युत कर्मचारी संघटनेचे पुणे विभाग अध्यक्ष कल्‍याण जाधव यांनी दिली. जुनी पेन्शन योजना बंद करून एनपीएस लागू करणे अशा धोरणांचा निषेध करण्यासाठी हा संप पुकारला आहे. न्याय्य हक्कांसाठी सर्व कामगारांनी संपात सामील व्हावे, असे आवाहन युनियनने केले आहे.