वाहतूक नियमांचे उल्‍लंघन, बेकायदा वाहनतळ

पिंपरी, ता. ८ : दापोडी मेट्रो स्‍थानक परिसरात निगडीहून पुण्याला जाणाऱ्या मार्गावर रस्‍त्‍याच्याकडेला रिक्षा, खासगी ट्रॅव्‍हल्‍स बस, दुचाकी वाहने उभी केली जात आहेत. रात्री आठ वाजण्याच्‍या सुमारास ही परिस्‍थिती आढळली. त्‍यामुळे इतर वाहनांना रहदारीस अडथळा येत आहे. ग्रेड सेपरेटरमधून वेगाने वाहने येत असल्‍याने अपघाताच्‍या शक्‍यता निर्माण झाली आहेत. तसेच सेवा रस्‍त्‍यावरील वाहनांची गती कमी होत आहे. फुगेवाडीकडून सांगवीकडे वळताना चौकात वाहतुकीचे नियम पाळले जात नसल्‍याचे चित्र होते.

कोंडीची कारणे -
- फुगेवाडीतून सांगवीकडे जाणारी वाहने ग्रेडसेपरेटरमधून येऊन रस्त्याच्या मध्येच थांबतात
- पुण्याकडून निगडीकडे जाणाऱ्या मार्गावर सीएनजी भरण्यासाठी थांबलेल्या वाहनांमुळे चौकात अडथळा
- गर्दीच्यावेळी वाहतूक पोलिसांचे पुरेसे नियंत्रण नसते

उपाय योजना -
- खासगी ट्रॅव्हल्स बसना रस्त्याकडेला थांबण्यास बंदी
- गर्दीच्यावेळी अधिक वाहतूक पोलिस कर्मचाऱ्यांची नियुक्ती
- पादचाऱ्यांसाठी योग्य पदपथ व वाहनांसाठी दुभाजक तयार करून वाहतुकीचे नियंत्रण

पिंपरीतून सांगवीकडे जाताना फुगेवाडी चौकातून वळत असतो. अशावेळी पुण्यावरून येणारी अनेक वाहने वाहतूक नियंत्रक दिव्यांचे पालन न करता वेगाने पुढे येतात. काही बोलायला गेल्‍यास वाद घालतात. सर्वांनीच नियम पाळणे आवश्‍यक आहे.
- यशवंत पोकळे, वाहनचालक