मोरवाडी चौकात पोलिसांसमोरच कोंडी

पिंपरी, ता.८ ः मोरवाडी चौकातील वाहतूक कोंडी ही एक मोठी समस्या आहे. मेट्रो आणि बीआरटीमुळे चौकात नेहमीच वाहतूक कोंडीचा सामना करावा लागत आहे. विशेषतः सायंकाळी बेकायदेशीरपणे उभी केलेली वाहने, पदपथावरील अतिक्रमणे आणि रिक्षांचा बेशिस्त पार्किंगमुळे पोलिसांच्या समोरच कोंडीत आणखीच भर पडत आहे. परिणामी, पादचाऱ्यांपासून वाहनचालक सर्वच जण त्रस्त झाले आहेत.
मोरवाडी चौकात झेब्रा क्रॉसिंगवर थांबवली जाणारी वाहने, झाडांच्या फांद्यांमुळे झाकले गेलेले सिग्नल, चुकीच्या पद्धतीने उभ्या रिक्षा, बीआरटी मार्गाचा गैरवापर ही त्यामागील कारणे आहेत. केवळ पीएमपी बससाठी राखीव असलेल्या बीआरटी मार्गाचा दुचाकी, चारचाकी वाहने सर्रास वापर करत आहेत.

वाहतूक कोंडीची कारणे
- रस्ते, पदपथावर अतिक्रमणे
- रिक्षाचालकांचा बेकायदा थांबा
- विरुद्ध दिशेने येणारी वाहने

उपाय योजना काय ?
- पुरेसे वाहतूक पोलिस आणि ट्रॅफिक वॉर्डन नेमणे
- रस्ते, पदपथांवरील अतिक्रमणे हटविणे
- बेशिस्त उभ्या रिक्षा, खासगी वाहनांकडून दंड आकारणी

वाहनचालक सिग्नलवर योग्य मार्गिकेमध्ये न थांबता पुढे येतात. बीआरटी मार्गावरून खासगी वाहने धावतात. त्यामुळे चौकात वाहने एकमेकांच्या समोर येतात. त्याने अपघात होण्याची शक्यता आहे.
- किरण खैरे, नागरिक, मोरवाडी