रहदारीची विद्यार्थी, पालकांना भीती

पिंपरी, ता. ८ : काळेवाडी येथील एम.एम.स्कूल आणि छत्रपती शिवाजी महाराज चौकात वाहतूक कोंडीची समस्या ही नित्याचीच बनली आहे. रात्री सात ते आठ वाजण्याच्या सुमारास व सकाळी शाळा सुटल्यावर विद्यार्थी, पालकांसह स्थानिकांना वाहतूक कोंडीच्या समस्येला सामोरे जावे लागत आहे.
या चौकात वाहतूक पोलिस विभाग, महापालिकेचे पूर्णपणे दुर्लक्ष झाले आहे. बीआरटीमधून दुचाकी, चारचाकी वाहने सर्रास ये-जा करत असतात. रस्त्यावर पथारी विक्रेते, हातगाडी विक्रेत्यांनी बस्तान मांडल्याने कोंडीत भर पडत असते.

कोंडीची कारणे...
- काळेवाडी फाटा, चिंचवडगाव, एम्पायर इस्टेट, पिंपरी मार्केटमधून येणारे वाहने एकत्र
- वाहतूक नियमांकडे दुर्लक्ष, वाहतूक पोलिस गैरहजर
- रस्त्याच्याकडेला पथारी चालकांचे अतिक्रमण

उपाय योजना काय ?
- वाहतूक पोलिसांची नियुक्ती
- वाहतुकीच्या नियमांबाबत जनजागृती
- महापालिकेच्या अतिक्रमण निर्मूलन विभागाची कारवाई

वाढत्या रहदारीमुळे मुलांना शाळेतून आणताना अपघाताची भीती वाटते. कोंडीमुळे वेळेचा मोठा अपव्यय होतो. पथारीधारकांनी इथे बस्तान मांडले आहे. महापालिका व वाहतूक पोलिस विभागाचे परिस्थितीकडे दुर्लक्ष झाले आहे.
- प्रदीप जोगदंड, काळेवाडी