बहुतांश वीजपुरवठा सुरळीत; मात्र लपंडाव सुरूच

पिंपरी, ता. ८ ः हिंजवडीतील महापारेषणच्या २२० केव्ही इन्फोसिस ते पेगासस अतिउच्चदाब भूमिगत वीज वाहिनीच्या दुरुस्तीचे काम मंगळवारीही (ता. ८) सुरू राहिले. दुपारी दोन वाजेपर्यंत ३५ उच्चदाब ग्राहकांपैकी २६ ग्राहकांचा वीजपुरवठा सुरळीत झाला. मात्र, विजेचा लपंडाव चालूच राहिला. सात अतिउच्चदाब ग्राहकांचा वीजपुरवठा अद्यापही विस्कळीत असल्याचे महावितरणच्यावतीने सांगण्यात आले.
हिंजवडी फेज २ येथे अतिउच्चदाब वाहिनीत झालेल्या बिघाडामुळे हिंजवडी व आजूबाजूच्या भागांतील ५२ हजारांहून अधिक वीज ग्राहकांना फटका बसला होता. हिंजवडीतील अनेक भागांमध्ये सोमवारी सकाळी वीज पुरवठा सुरू झाला. मारुंजी, माण येथील रहिवासी भागांमध्ये रविवारी सकाळी अकरा वाजता खंडित झालेला वीजपुरवठा सोमवारी (ता.७) रात्री साडेअकराच्या सुमारास सुरळीत करण्यात आला. मात्र, हा वीज पुरवठा चक्राकार पद्धतीने सुरू असल्याने मंगळवारी देखील (ता.८) या भागात विजेचा लपंडाव सुरूच होता. मारुंजी, माण, हिंजवडी फेज -२ या भागांतील काही सोसायट्यांमध्ये सोमवारीही सात ते आठ तास वीज नसल्याची तक्रार नागरिकांनी केली.

देखभाल व दुरुस्तीच्या कामासाठी रविवारी सकाळी वीज पुरवठा खंडित करण्यात आला होता. तो सोमवारी रात्री साडेअकराच्या सुमारास सुरळीत झाला. जवळपास ३६ तास सोसायटीतील नागरिक अंधारात होते. त्यानंतर आजही दिवसभर वीजेचा लपंडाव सुरू राहिला. त्यामुळे नागरिकांच्या दैनंदिनी कामावर मोठा परिणाम झाला.
- श्रीकांत शेळके, रहिवासी, लाइफ रिपब्लिक

पोलिसांनी हिंजवडीतील वाहतूक कोंडीचे उत्तम नियोजन केल्याने सोमवारच्या तुलनेत मंगळवारी कोंडी कमी होती. त्यामुळे कार्यालयात जाणाऱ्या कर्मचाऱ्यांना मोठा दिलासा मिळाला. मात्र, येथील अनेक रहिवासी सोसायट्यांमध्ये दिवसभरात किमान चार ते पाच तास वीजपुरवठा खंडित झाला होता.
- आशुतोष पांडे, आयटी कर्मचारी, हिंजवडी फेज २