नदी पुनरुज्जीवन प्रकल्पाचा मार्ग मोकळा

पिंपरी, ता. ८ : पिंपरी चिंचवड महापालिकेच्‍या पवना नदी पुनरुज्जीवन प्रकल्‍पासाठी राज्‍य शासनाच्‍या राज्य तज्ञ मूल्यांकन समिती (क्रमांक ३) विभागाचा पर्यावरण ना हरकत दाखला प्राप्‍त झाला आहे. या प्रकल्पाकरिता राज्य व केंद्र शासनाकडून निधी प्राप्त झाल्यानंतर निविदा प्रक्रियेची कार्यवाही केली जाणार आहे.
महापालिकेने दिलेल्‍या माहितीनुसार, पिंपरी चिंचवड महानगरपालिकेने पवना नदीचे पुनरुज्जीवन करण्याकरिता महत्वकांक्षी प्रकल्पाचे नियोजन आहे. शहराच्या मध्यवर्ती भागातून पवना नदी वाहत असून तिची लांबी २४.४० किलोमीटर आहे. त्या अनुषंगाने पिंपरी चिंचवड महापालिकेमार्फत अनुभवी तांत्रिक सल्लागार मे.एचसीपी डिझाईन ॲण्ड मॅनेजमेंट प्रायव्‍हेट लिमिटेड यांची नेमणूक करण्यात आली आहे. या सल्लागाराने पवना नदीचे संपूर्ण सर्वेक्षण केले आहे. नदीच्या पाण्याचे प्रदूषण कमी करणे व पूर नियंत्रण विषयक काम करण्यासाठी विस्तृत प्रकल्प अहवाल तयार केला. या प्रकल्पाचा हायड्रोलॉजी व हायड्रोलिक्स अहवाल केंद्र सरकारच्या पुण्यातील केंद्रीय जल आणि ऊर्जा संशोधन केंद्रामार्फत तयार करण्यात आला आहे.

पिंपरी चिंचवड महापालिकेमार्फत पवना नदी पुनरुज्जीवन प्रकल्पाकरिता पर्यावरण ना हरकत दाखला मिळण्यासाठी राज्य शासनाला १० डिसेंबर २०१९ रोजी अर्ज करण्यात आला होता. राज्य शासनाच्या समितीमार्फत त्याला ८ ऑगस्‍ट २०२३ रोजी मंजुरी देण्यात आली. त्‍यानंतर, या अर्जावर शासनाच्या राज्य पर्यावरण प्रभाव मूल्यांकन प्राधिकरण समिती मार्फत वेळोवेळी बैठक घेण्यात आली. या समितीमार्फत १५ मे २०२५ रोजी बैठक आयोजित केली. महापालिका आयुक्तांनी त्यामध्ये प्रकल्पाच्या माहितीचे सादरीकरण केले. ७ जुलै २०२५ रोजी समितीच्या बैठकीचा सभावृतांत प्रसिद्ध झाला. त्यामध्ये पिंपरी चिंचवड महापालिकेच्या पवना नदीचे पुनरुज्जीवन प्रकल्पास पर्यावरण ना हरकत दाखला देण्यात आला आहे.

नदी काठाचे संरक्षण, त्याची होणारी झीज टाळणे, जैवविविधता संवर्धन, पक्षांची घरटी, निवासस्थाने निर्माण करण्यासाठी ठिकाणे, जवळचे जलाशय व नदीमध्ये जलचरांच्या वाढीसह नदीच्या एकंदरीत नैसर्गिक पुनरुज्जीवनासाठी हा प्रकल्प उपयोगी ठरणार आहे.
- संजय कुलकर्णी, मुख्य अभियंता, पर्यावरण विभाग, पिंपरी चिंचवड महापालिका