हिंजवडीतील वीजपुरवठा ७२ तासांनी पूर्वपदावर

पिंपरी, ता. ९ ः हिंजवडीतील अतिउच्चदाब वाहिनीत झालेला बिघाड दुरुस्त करण्यास महापारेषणला बुधवारी (ता.९) तब्बल ७२ तासांनंतर यश आले. त्यामुळे, नागरिक व आयटी कर्मचाऱ्यांनी सुटकेचा निःश्‍वास टाकला.
हिंजवडी फेज २ जवळ २२० केव्ही इन्फोसिस ते पेगासस या वाहिनीत रविवारी (ता. ६) दुपारी दोनच्या सुमारास बिघाड झाला होता. त्याने हिंजवडी, माणसह आजूबाजूच्या परिसरातील रहिवासी व औद्योगिक भागांतील वीजपुरवठा खंडित झाला होता. हिंजवडीतील डॉलर कंपनीजवळ वाहिनीच्या दुरुस्तीचे काम सुरू होते. तब्बल तीन दिवसांच्या कालावधीनंतर बुधवारी (ता.९) दुपारी १२.४० वाजता ही वाहिनी दुरुस्त करण्यात महापारेषणला यश आले. त्यामुळे हिंजवडीसह परिसरातील सर्व उद्योगांचा वीजपुरवठा पूर्वपदावर आला आहे, अशी माहिती महावितरणकडून देण्यात आली.

दुरुस्ती कामासाठी बंद
हिंजवडी व पेगासस २२० केव्ही अतिउच्चदाब उपकेंद्रातील देखभाल व दुरुस्तीच्या कामासाठी महापारेषण कंपनीने रविवारी सकाळी ११ वाजता वीजपुरवठा बंद केला होता. दुरुस्तीचे काम झाल्यानंतर दुपारी २.१० वाजता या वाहिनीत हिंजवडी फेज -२ मधील मेट्रो स्थानकाजवळ बिघाड झाला. त्यामुळे २५ उच्चदाब वाहिन्यांवरील ५२ हजार लघुदाब ग्राहक, इन्फोसिस व नेक्सट्रा हे दोन अतिउच्चदाब ग्राहकांसह ९१ उच्चदाब ग्राहकांचा वीजपुरवठा खंडित झाला. त्यापैकी रहिवासी ग्राहकांचा वीजपुरवठा सोमवारी सुरू करण्यात आला होता. मात्र, हा पुरवठा चक्राकार पद्धतीने सुरू असल्याने अनेकदा वीज खंडित होत होती. तर अतिउच्चदाब ग्राहकांपैकी ९ ग्राहकांना चक्राकार पद्धतीने वीजपुरवठा करण्यात येत होता. बुधवारी दुरुस्तीचे काम झाल्यानंतर या ग्राहकांचा वीजपुरवठा सुरळीत झाला. हिंजवडीतील नागरिकांनीही बुधवारी वीज पुरवठा विस्कळीत झाले नसल्याचे सांगितले.

महापारेषणचा बिघाड मोठ्या स्वरुपाचा होता. बाधित उपकेंद्रातील विजेची मागणी पाहता इतर उपकेंद्रांतून वीजपुरवठा पर्यायी मार्गाने वळविणे हे मोठे अवघड काम होते. परंतु, कर्मचाऱ्यांच्या परिश्रमाच्या जोरावर आम्ही संकटावर मात केली.
- सुनील काकडे, मुख्य अभियंता, महावितरण, पुणे परिमंडल