चिमुकले तापाने फणफणले

पिंपरी, ता. ९ : बदललेल्या वातावरणामुळे लहान मुलांमध्ये तापाचे प्रमाण वाढले आहे. यात डेंगी आणि टायफॉइडचेही रुग्ण आढळून येत आहेत. या दोन आजारांच्या चाचण्या नकारात्मक येऊनही तीन दिवसांपेक्षा अधिक काळ ताप येत असल्याचे निरीक्षण डॉक्टरांनी नोंदवले आहे. त्यामुळे पालकांनी आपल्या मुलांची विशेष काळजी घ्यावी, असे आवाहन वैद्यकीय तज्ज्ञ करत आहेत.

या वर्षी शहरात पावसाने लवकरात हजेरी लावली. परिणामी विषाणूजन्य व कीटकजन्य आजारांच्या प्रमाणातही वाढ दिसत आहे. विषाणूजन्य आजारांचा प्रसार लहान मुलांमध्ये वेगाने होत असल्याने सर्दी, खोकला, ताप, पोट बिघडणे, उलटी होणे या आजारांचे प्रमाण वाढले आहे. अनेकदा ताप हा तीन दिवसांपेक्षा अधिक राहिल्यास डेंगी किंवा टायफॉइडची तपासणी करण्यास सांगितले जाते. मात्र, या चाचण्या नकारात्मक येऊनही मुलांमध्ये ताप चार ते पाच दिवस राहत आहे. त्यामुळे मुलांना रुग्णालयातही भरती करावे लागत आहे.

लहान मुलांची काय काळजी घ्यावी
- संसर्गजन्य आजारांपासून बचावासाठी मास्क वापरावे
- पोटाचे आजार टाळण्यासाठी बाहेरचे अन्न, फास्ट फूड टाळावे
- घरातील ताजे व गरम अन्न खावेइ
- फळे व भाज्या स्वच्छ धुवून घ्याव्यात
- पाणी उकळून, गाळून प्यावे
- बचावासाठी फ्ल्यू व टायफॉइड प्रतिबंधक लस द्यावी
- निर्जलीकरण टाळण्यासाठी पाणी अधिक प्रमाणात प्यावे
- मुलांची रोगप्रतिकारक क्षमता वाढेल असा आहार असावा

सध्या लहान मुलांमध्ये सर्दी खोकल्यासोबतच तापाचे प्रमाण वाढले आहे. अनेक मुलांचा ताप तीन दिवसांपेक्षा अधिक राहत आहे. यामध्ये एक ते नऊ वर्षांपर्यंतच्या वयोगटातील मुले आहेत. तापाचे प्रमाण अधिक असेल, तर मुलांना रुग्णालयात भरती करावे लागत आहे. त्यामुळे मुलांची रोगप्रतिकारशक्ती उत्तम राहील, याची काळजी पालकांनी घेणे आवश्‍यक आहे.
- डॉ. शुभांगी चौधरी, वैद्यकीय तज्ज्ञ