खडकी मेट्रो ते पादचारी पुलास विलंब प्रवाशांची वाढती गैरसोय; प्रत्यक्ष कामास अद्याप मुहूर्त नाही

पिंपरी, ता. १० : पुणे मेट्रोच्या फेऱ्यांमध्ये खडकी मेट्रो स्थानकाचा समावेश झाल्याने हजारो प्रवाशांना दिलासा मिळाला आहे. मात्र, खडकी मेट्रो स्थानक ते खडकी रेल्वे स्थानकाला जोडणारा पादचारी पूल अद्यापही अपूर्ण असल्याने स्थानिक प्रवाशांना मोठ्या गैरसोयींचा सामना करावा लागत आहे. या पुलाच्या प्रतिक्षेत असलेल्या प्रवाशांना संयम सुटत असून, लांबचा पल्ला गाठावा लागत असल्याने नाहक त्रास सहन करावा लागत आहे.

स्थानक सुरू पण पूल अधांतरी
- खडकी मेट्रो स्थानक २१ जूनपासून प्रवाशांच्या सेवेत
- खडकी रेल्वे स्थानकाला जोडणारा पादचारी पूल अद्याप अपूर्ण
- रेल्वे आणि मेट्रो प्रशासनात चर्चा सुरू असली तरी कोणताही ठोस निर्णय नाही
- खडकी मेट्रो स्थानकाच्या कार्यान्वयानंतर सांगवी, बोपोडी, दापोडी, खडकी परिसरातील लोकांना मेट्रोचा जलद आणि आरामदायक पर्याय
- लोकल ट्रेनने प्रवास करणाऱ्यांना मेट्रो स्थानकापर्यंत पोहोचण्यासाठी लांबचा वळसा घालावा लागतोय
---
पादचारी पुलाचे महत्त्व
- खडकी रेल्वे स्थानक व मेट्रो स्थानक यांच्यातील अंतर जेमतेम काहीसे मीटरचे आहे. पण थेट मार्ग नसल्याने प्रवाशांना रेल्वे रूळ ओलांडण्याचा धोका पत्करावा लागतो
- रस्त्याने चक्कर मारून १५-२० मिनिटे अतिरिक्त चालावे लागते.
विद्यार्थी, महिला व ज्येष्ठांना विशेष त्रास सहन करावा लागतो
---
खडकी परिसरातील महत्त्वाची ठिकाणे:
ॲम्युनिशन फॅक्टरी
खडकी बाजार
विविध शासकीय कार्यालये
कॉलेज व शैक्षणिक संस्था
खडकी कॅंन्टोमेंट क्षेत्र
---
‘‘रेल्वे स्टेशनपासून मेट्रो स्टेशनपर्यंत चालत जावे लागते. प्रशासनाने त्वरित पूल कार्यान्वित करावा.
- अनिल मोरे, दापोडी.

‘‘खडकी मेट्रो स्थानकातील पादचारी पुलाबाबत रेल्वे प्रशासनाची सकारात्मक चर्चा सुरू आहे. या पुलाचे काम त्वरित पूर्ण होऊन प्रवाशांच्या सेवेत दाखल होणार आहे.
-हेमंत सोनावणे, जनसंपर्क अधिकारी, मेट्रो.
...
एकात्मिक पूल आणखी कोठे आहेत :
नाशिक फाटा, शिवाजीनगर आणि पुणे स्टेशन या ठिकाणी एकात्मिक (इंटिग्रेटेड) पूल करण्यात आले आहेत. यानंतर खडकी येथे अशाच पद्धतीचा मेट्रो आणि रेल्वेला जोडणारा पूल बांधण्यात येणार आहे.
...