तीन गावांतील भूसंपादन रखडले

पिंपरी, ता. १० : पुणे महानगर प्रदेश विकास प्राधिकरणाच्‍या (पीएमआरडीए) वतीने रिंगरोडचे काम सुरू आहे. पण, यात तीन गावांचे भूसंपादन रखडले आहे. प्रस्‍तावित जमीन मोजणीला दोन गावांनी विरोध दर्शवला आहे. तर, एका गावात मोजणी झाली नाही. अन्य दहा गावांत मोजणी पूर्ण झाली आहे. दरम्यान, ‘‘या प्रकरणी चर्चा सुरू आहे. त्‍यांचेही काम मार्गी लागेल’’ असे अधिकारी सांगत आहेत.
‘पीएमआरडीए’ हद्दीतील वडाचीवाडी, भिलारेवाडी, पिसोळी, येवलेवाडी, गुजर निंबाळकरवाडी, मांगडेवाडी, जांभूळवाडी, आंबेगाव खुर्द, कदमवाक वस्ती, सोळू, निरगुडी, वडगाव शिंदे, म्‍हाळुंगे या गावांची संयुक्त मोजणी प्रस्तावित होती. येवलेवाडी, जांभूळवाडी आणि कदमवाक वस्ती या तीन गावांतील संयुक्त मोजणी बाकी आहे.
महाराष्ट्र राज्य रस्ते विकास महामंडळाने (एमएसआरडीसी) रिंगरोडचे काम सर्वांत आधी हाती घेतले. ठोपाठ ‘पीएमआरडीए’ने ८३ किलोमीटरच्या आणि ६५ मीटर रुंदीच्या रिंगरोडचे काम हाती घेतले आहे. यासाठी सुमारे ११५ हेक्टर भूसंपादन करावे लागणार आहे. रस्ते विकास महामंडळ करीत असलेला रिंग रोड सोलू गावपर्यंत असेल. जिल्हाधिकारी कार्यालयाच्‍या वतीने मोजणी पूर्ण करण्यात येत आहे. मोजणी पूर्ण झालेल्या गावांमधील जमिनींची थेट खरेदीने प्रशासनाकडून प्रक्रिया सुरू आहे.

जांभूळवाडी, कदमवाक वस्ती, येवलेवाडी या ठिकाणचे भूसंपादन शिल्‍लक आहे. जिल्‍हाधिकारी कार्यालयामार्फत ती प्रक्रिया सुरू आहे. लवकरच सर्व प्रश्‍न मार्गी लागतील.
- आशा जाधव, अधीक्षक, भूमी अभिलेख. पीएमआरडीए