पिंपरी अनधिकृत बांघकाने आयुक्त

अनधिकृत बांधकामे, अतिक्रमणांवर
कारवाई करा ः आयुक्त सिंह

पिंपरी, ता. ९ ः शहरातील अनधिकृत बांधकामावर तातडीने कारवाई करावी. पदपथांवर अतिक्रमण होणार नाही, यासाठी पथकांची नियुक्ती करा. कारवाईत सातत्य ठेवा, असा आदेश महापालिका आयुक्त तथा प्रशासक शेखर सिंह यांनी दिला.
शहरातील अनधिकृत बांधकामे व अतिक्रमणविरोधी मोहिमेचा आढावा घेतल्यानंतर आयुक्त सिंह अधिकाऱ्यांच्या बैठकीत बोलत होते. ते म्हणाले, ‘‘सध्या शहरात सुरू असलेली सर्व प्रकारची अनधिकृत बांधकामावर तत्काळ कारवाई करावी. नियमातील तरतुदीनुसार कारवाईपूर्वी २४ तास अगोदर नोटीस द्या. पदपथांवरील अतिक्रमणे काढा. सर्व प्रभाग अधिकारी व बीट निरीक्षकांनी सतर्क राहावे. कारवाईमध्ये टाळाटाळ करणाऱ्या अधिकारी, कर्मचाऱ्यांवर तत्काळ निलंबनाची कारवाई केली जाईल. अनियमित बांधकामे व अतिक्रमणांवर लक्ष ठेवण्यासाठी स्वतंत्र दक्षता पथक सक्रिय केले आहे. त्यांच्याकडून मिळालेल्या अहवालाच्या आधारे कारवाई केली जाईल.’’ कोणत्या प्रभागात अतिक्रमण, अनधिकृत बांधकामाची समस्या जास्त आहे, ती सोडवण्यासाठी काय उपाययोजना सुरू आहेत, यावरही बैठकीत सविस्तर चर्चा झाली. परवानगीविना सुरू असलेल्या आठवडे बाजारांचाही आढावा आयुक्तांनी घेतला.
---