शहरात गुरुपौर्णिमा उत्साहात मंदिरांमध्ये दर्शनासाठी गर्दी, विविध धार्मिक कार्यक्रम

पिंपरी, ता. १० ः ना वयाचे बंधन, ना नात्याचे जोड, ज्याला आहे अगाध ज्ञान,
जो देई नि:स्वार्थ दान, गुरू त्यासी मानावा, देव तेथेची जाणावा.
जीवनात प्रत्येक टप्प्यावर गुरूची गरज भासते म्हणूनच आई, शिक्षक आणि साक्षात परमेश्‍वरालाही गुरू मानले जाते. आपल्या या गुरूंप्रती कृतज्ञता व्यक्त करण्याचा दिवस म्हणजे गुरुपौर्णिमा. या निमित्ताने शहरात ठिकठिकाणी विविध कार्यक्रमांचे आयोजन करण्यात आले होते. शहरातील स्वामी समर्थांचे मठ, साई मंदिर या ठिकाणी सकाळपासूनच नागरिकांनी दर्शनासाठी गर्दी केली होती. शहरातील विविध मंदिरांमध्येही पूजा, अभिषेक, भजन, प्रवचन अशा विविध धार्मिक कार्यक्रमांचे आयोजन करण्यात आले होते.
गुरुपौर्णिमेनिमित्त मंदिरांना फुलांची सुंदर सजावट करण्यात आली होती. शहरातील निगडी, प्राधिकरण, चिंचवड, वाल्हेकरवाडी येथील स्वामी समर्थ मंदिर तसेच प्राधिकरण, निगडी, संभाजीनगर, बिजलीनगर, चिंचवड रस्टन कॉलनी, चिंचवड स्टेशन, मोशी प्राधिकरण येथील दत्तमंदिरामध्ये तसेच वडमुखवाडी, संभाजीनगर, साई चौक पिंपरी, पिंपळे सौदागर, मासुळकर कॉलनी येथील साई मंदिरांमध्ये मोठी गर्दी दिसून आली.

स्वामी समर्थ मंदिरात कार्यक्रम
गुरुपौर्णिमेनिमित्त चिंचवडमधील शिवतेजनगर येथील स्वामी समर्थ मंदिरात सकाळपासूनच विविध धार्मिक कार्यक्रमांचे आयोजन करण्यात आले होते. सकाळी होमहवन व अभिषेक पार पडले. तर दुपारी विविध भजनी मंडळाच्या महिलांनी आपली सेवा सादर केली. त्यानंतर किसनरावमहाराज चौधरी यांचे प्रवचन झाले. यावेळी गुरुजनांचा सन्मानही करण्यात आला. सायंकाळी महाआरती व प्रसादाने कार्यक्रमांचा समारोप झाला. गुरुपौर्णिमेनिमित्त मंदिराला सुंदर अशी सजावट करण्यात आली होती. सकाळपासूनच भक्तांनी दर्शनासाठी मोठी गर्दी केली होती. श्री स्वामी समर्थ सेवा प्रतिष्ठानचे नारायण बहिरवाडे यांच्यासह कार्यकर्त्यांनी या कार्यक्रमांचे आयोजन केले होते.

सनातन संस्थेच्यावतीने महोत्सव
सनातन संस्थेच्यावतीने तळेगाव व चिंचवड येथे गुरुपौर्णिमा महोत्सवाचे आयोजन करण्यात आले होते. महोत्सवाच्या सुरवातीला व्यासपूजन, भक्तराज महाराज यांचे प्रतिमा पूजन करण्यात आले. त्यानंतर समाज, राष्ट्र, धर्म या विषयांवर तज्ज्ञांचे मार्गदर्शन पार पडले. तसेच विविध विषयांवर ग्रंथप्रदर्शन व फलक प्रदर्शनाचेही यावेळी आयोजन करण्यात आले होते.

फोटो ः 30237, 30239, 30240