ऑनलाइन कर भरा, ४ टक्के सवलत मिळवा महापालिकेची योजना ः मालमत्ताधारकांना ३० सप्टेंबरपर्यंत मुदत

पिंपरी, ता. १० : पिंपरी-चिंचवड शहरातील मिळकतधारकांना १ जुलै ते ३० सप्टेंबर दरम्यान महापालिकेचा मालमत्ता कर ऑनलाइन भरल्यास सामान्य करावर ४ टक्के सवलत मिळणार आहे. ज्या मालमत्ताधारकांनी अद्याप मालमत्ता कर भरला नाही, त्यांनी तत्काळ भरून सवलतीचा लाभ घ्यावा, असे आवाहन महापालिकेच्यावतीने करण्यात येत आहे.
पिंपरी-चिंचवड महापालिकेने आर्थिक वर्ष २०२५-२६ चा मालमत्ता कर ३० जून २०२५ पूर्वी ऑनलाइन कर भरणाऱ्यांना १० टक्के सवलत महापालिकेच्यावतीने देण्यात आली होती. या सवलतीचा लाभ तब्बल ३ लाख ३७ हजार मालमत्ताधारकांनी घेतला आहे. ज्या मालमत्ताधारकांना या सवलतीचा लाभ घेता आला नाही, त्यांनी ३० सप्टेंबर २०२५ पर्यंत मालमत्ता कर ऑनलाइन भरल्यास आता ४ टक्के सवलतीचा लाभ दिला जाणार आहे.

थकबाकीदारांवर कारवाईस सुरवात
महापालिकेच्या कर आकारणी व कर संकलन विभागामार्फत थकबाकी असलेल्या मालमत्ताधारकांवर जप्तीची कारवाई सुरु केली आहे. या मोहिमेअंतर्गत १८ विभागीय कार्यालयांमार्फत आतापर्यंत ३४ हजार ७६९ मालमत्ताधारकांना जप्तीपूर्वी नोटीस बजावण्यात आली आहे. ज्या थकबाकीदारांना नोटीस देऊनही पहिल्या तिमाहीत कर भरण्याबाबत टाळाटाळ करण्यात आली आहे, अशा मालमत्तांवर कारवाई करण्यास कर संकलन विभागाने सुरवात केली आहे.

दरवर्षी पहिल्या तिमाहीत ऑनलाइन कर भरणारे मालमत्ताधारक
आर्थिक वर्ष / मालमत्ताधारक
२०२०-२१ / ८८ हजार ९०
२०२१-२२ / १ लाख ११ हजार १
२०२२-२३ / १ लाख २८ हजार १५
२०२३-२४ / २ लाख ९ हजार ६२५
२०२४-२५ / २ लाख ६० हजार ७५७
२०२५-२६ / ३ लाख ३७ हजार

ऑनलाइन कर भरणाऱ्यांची वाढती संख्या ही नागरिकांचा महापालिकेवरचा विश्वास दर्शवते. ज्या मालमत्ताधारकांनी अद्याप मालमत्ता कर भरला नाही, त्यांनी तत्काळ ऑनलाइन कर भरून ४ टक्के सवलतीचा लाभ घ्यावा.

- प्रदीप जांभळे पाटील, अतिरिक्त आयुक्त, पिंपरी-चिंचवड महापालिका

---------