कामगारांसाठी नवीन रोजगार प्रोत्साहन योजना ‘पीएफ’ कार्यालयाकडून कार्यवाही होणार, आयुक्‍त सनत कुमार, सुब्रत कुमार यांची माहिती

पिंपरी, ता. ११ : सरकारने रोजगार वाढविण्यासाठी नवीन प्रोत्साहन योजना जाहीर केली आहे. ही योजना १ ऑगस्ट २०२५ ते ३१ जुलै २०२७ या दोन वर्षांसाठी लागू राहणार आहे. यासाठी ९९ हजार ४४६ कोटी खर्च होणार आहे. या योजनेतून कामगारांना नोकरीसाठी आणि नियोक्त्यांना अधिक लोकांना कामावर घेण्यासाठी प्रोत्साहन दिले जाणार आहे, अशी माहिती आकुर्डी कार्यालयाचे प्रथम विभागीय आयुक्त सनत कुमार आणि हिंजवडी कार्यालयाचे प्रथम विभागीय आयुक्त सुब्रत कुमार यांनी आकुर्डी येथे झालेल्‍या पत्रकार परिषदेत दिली. सर्व नियोक्त्यांना आणि कामगारांना यामध्ये सहभागी होण्याचे आवाहन या वेळी त्‍यांनी केले.
ही योजना कर्मचाऱ्यांसाठी आणि कंपन्‍यांसाठी (नियोक्‍त्‍यांसाठी) राबविण्यात येणार आहे. कर्मचाऱ्यांमध्ये जे कामगार पहिल्यांदाच ‘ईपीएफओ’मध्ये नोंदणी करून नोकरीला लागतील त्यांना लाभ मिळणार आहे. तसेच ज्‍यांचे मासिक वेतन एक लाखांपर्यंत आहे, त्यांना १५ हजार इतका लाभ दोन टप्प्यांत दिला जाईल. पहिला हप्ता सहा महिने पूर्ण केल्यावर आणि दुसरा हप्ता बारा महिने सेवा व आर्थिक साक्षरता कार्यक्रम पूर्ण केल्यानंतर मिळेल. ही रक्कम सुरक्षित बचत खात्यात जमा होऊन नंतर काढण्याची देखील सुविधा आहे. रक्कम थेट आधार ब्रिज पेमेंट सिस्टमद्वारे डीबीटी पद्धतीने खात्यात जमा होणार असल्‍याचेही कुमार यांनी सांगितले.
तसेच नियुक्‍त्‍यांना मिळणाऱ्या लाभांमध्ये ज्यांनी नवीन कर्मचाऱ्यांना काम दिले. त्यांना सरकारकडून दर महिन्याला पैसे दिले जाणार आहेत. प्रत्येक नवीन कर्मचाऱ्यावर सरकार प्रत्‍येक महिन्‍याला तीन हजार रुपये दोन वर्षांसाठी देणार आहे. उत्पादन क्षेत्रात हे चौथ्या वर्षापर्यंत मिळण्याची सुविधा आहे. ५० हून कमी कर्मचारी असलेल्या कंपन्यांनी किमान २ लोकांना आणि ५० पेक्षा जास्त कर्मचारी असलेल्या कंपन्यांनी किमान ५ लोकांना कायम ठेवणे गरजेचे आहे, अशी अट आहे. ही रक्कम नियोक्त्याच्या पॅन लिंक केलेल्या खात्यात जमा होणार आहे, अशी माहिती आयुक्‍त सनत कुमार, सुब्रत कुमार यांनी दिली.