सुजाण नागरिक होण्याचा प्रयत्न केला पाहिजे : पाटील

पिंपरी, ता. १४ : ‘‘विद्यार्थ्यांनी आपल्या गुरुजनांचा आदर केला पाहिजे. आयुष्यात भेटणारी प्रत्येक व्यक्ती आपल्याला नवीन शिकवण व अनुभव देत असते. त्यामुळे प्रत्येकाचा आदर करायला शिकले पाहिजे,’’ असे प्रतिपादन समुपदेशक मार्गदर्शक सतीश पाटील यांनी नुकतेच केले.
‘सकाळ माध्यम समूहा’च्या वतीने राबविण्यात येणाऱ्या ‘सकाळ एनआयई’च्या वतीने कॅम्प एज्युकेशन सोसायटीच्या औद्योगिक प्रशिक्षण संस्था येथे युवकांची सामाजिक बांधिलकी या विषयावर गुरुपौर्णिमेनिमित्त आयोजित करण्यात आले होते. या वेळी पाटील यांनी विद्यार्थ्यांशी संवाद साधला. संस्थेचे प्राचार्य बसवराज विभूते, गटनिदेशक मनिषा गाढवे, हणमंत सावंत, अर्जुन कदम, वैशाली ढेरंगे, श्यामल खडबडे, मनिषा साने उपस्थित होते. पाटील म्हणाले, ‘युवकांनी नेहमी मोठे ध्येय ठेवले पाहिजे. आपल्या आईवडिलांची स्वप्न साकार करण्याचा प्रयत्न केला पाहिजे. सुजाण नागरिक होण्याचा प्रयत्न केला पाहिजे. चांगल्या गोष्टींची सुरूवात आपल्यापासून केल्यास भविष्यात त्याचा नक्की उपयोग होतो.’ यावेळी त्यांनी विविध यशस्वी लोकांची माहिती दृकश्राव्य पद्धतीने सादर केली. समीर अडागळे, ऋतुराज गुळुंजकर या प्रशिक्षणार्थी विद्यार्थ्यांनी आपले मनोगत व्यक्त केले. रिया सोनवणे हिने आभार मानले.

मॉडर्न हायस्कूलमध्ये गुरूपौर्णिमानिमित्त कथाकथन
प्रोग्रेसिव्ह एज्युकेशन सोसायटीच्या मॉडर्न हायस्कूल येथे ‘सकाळ एनआयई’च्या वतीने गुरुपौर्णिमेनिमित्त कथाकथन कार्यक्रमाचे आयोजन करण्यात आले होते. यात विवेक गुरव यांनी विद्यार्थ्यांना कथाकथनाच्या माध्यमातून संस्कारक्षम गोष्टी सांगितल्या. विविध क्रांतिकारकांच्या कथांच्यामाध्यमातून भारतीय स्वातंत्र्य लढ्याचा जाज्वल्य इतिहास त्यांनी विद्यार्थ्यांसमोर सादर केला. विद्यार्थ्यांनी वाचन व संभाषण कौशल्ये विकसित केले पाहिजेत, असे त्यांनी सांगितले. सभाधीटपणा व वक्तृत्व यांची माहिती सादर करताना त्यांनी संभाषण कौशल्याचे महत्त्व विशद केले. विद्यालयाच्या मुख्याध्यापिका शारदा साबळे, पर्यवेक्षक विजय पाचारणे, मनिषा नेवाळे बोत्रे, मीना अधिकारी, शिवाजी अंबिके व सहकारी शिक्षक यांनी संयोजन केले. ‘सकाळ’ एनआयईचे व्यवस्थापक विशाल सराफ यांनी प्रास्ताविक व संयोजन केले.