राष्ट्रीय सांख्यिकी कार्यालयाच्‍या सहसंवाद सत्राचे उद्घाटन

पिंपरी, ता. ११ : पश्चिम विभागातील राष्ट्रीय सांख्यिकी कार्यालयाच्या कर्मचाऱ्यांसाठी घाऊक किंमत निर्देशांक, उत्पादक किंमत निर्देशांक आणि औद्योगिक उत्पादन निर्देशांक या विषयावर एक दिवसीय प्रशिक्षण सहसंवाद सत्राचे आयोजन करण्यात आले होते. आकुर्डी येथे हे शिबिर पार पडले. नागपूर पश्चिम विभागाचे उपमहासंचालक श्रीनिवास उप्पाला आणि नवी दिल्लीच्या उद्योग संवर्धन आणि आंतरिक व्यापार विभागाचे उपमहासंचालक दिलीप कुमार सिन्हा यांच्‍या हस्‍ते प्रशिक्षण सत्राचे उद्घाटन पार पडले.
उद्योग संवर्धन आणि आंतरिक व्यापार विभाग (डीपीआयआयटी), वाणिज्य आणि उद्योग मंत्रालय; सांख्यिकी आणि कार्यक्रम अंमलबजावणी मंत्रालयाच्या आर्थिक सांख्यिकी विभागाचे अधिकारी, राष्ट्रीय सांख्यिकी कार्यालयाच्‍या सांख्यिकी आणि कार्यक्रम अंमलबजावणी मंत्रालय यांचे अधिकारी आणि कर्मचारी यांनी या सत्रात भाग घेतला.
श्रीनिवास उप्पाला यांनी घाऊक किंमत निर्देशांकांच्या नवीन मालिकेचे महत्त्व आणि धोरण तयार करण्यासाठी उपाययोजना सुचविल्या. घाऊक स्तरावर किमतीच्या बदलांवर लक्ष ठेवण्यात त्यांची भूमिका मांडली. ‘डीपीआयआयटी’चे उपमहासंचालक दिलीप कुमार सिन्हा यांनी २०२२-२३ या वर्षासह घाऊक किंमत निर्देशांक आणि उत्‍पादक किंमत निर्देशकांच्या नवीन मालिकेसाठी डेटा संकलन जलद करण्याची गरज असल्‍याचे सांगितले.
क्षेत्रीय कार्यालय पुणेच्या सहसंचालक डॉ. रुही कुलकर्णी यांनी प्रास्‍ताविक केले आणि आभार मानले.