बांधकाम, अग्निरोधक परवान्यांची फाईलच गहाळ

अमोल शित्रे ः सकाळ वृत्तसेवा

पिंपरी, ता. १२ ः रुग्णांना विनामूल्य दर्जेदार वैद्यकीय सेवा देण्यासाठी सुरू झालेल्या मोहननगर येथील राज्य कामगार विमा (ईएसआय) रुग्णालयाच्या अत्याधुनिकीकरण करण्यास अनंत अडचणी येत आहेत. रुग्णालयाची बांधकाम आणि अग्निरोधक परवान्यांच्या कागदपत्रांची फाईलच गहाळ झाल्यामुळे अत्याधुनिकीकरण करण्यास राज्याच्या आरोग्य विभागाकडून परवानगी दिली जात नसल्याची गंभीर बाब समोर आली आहे. त्यामुळे फाईल शोधण्यासाठी रुग्णालय प्रशासनाची पळापळ सुरू आहे. मात्र, त्यामुळे कष्टकरी कामगारांना भोगावे लागत आहेत.
पिंपरी चिंचवड परिसरासह चाकण, तळेगाव, लोणावळा, हिंजवडी, मुळशी या भागांत पोटाची खळगी भरण्यासाठी काबाडकष्ट करणाऱ्या कामगारांना विनामूल्य आरोग्य सेवा देण्यासाठी पिंपरी-चिंचवड येथील मोहननगर येथे १९९७-९८ मध्ये ईएसआय रुग्णालय सुरू झाले. मात्र, काही कारणास्तव तब्बल दहा वर्षे रुग्णालयाची इमारत धूळखात पडली. २००७-०८ मध्ये पिंपरी-चिंचवड महापालिकेतील तत्कालीन सत्ताधाऱ्यांनी या रुग्णालयाचे उद्‍घाटन केले. सुरुवातीला रुग्णालयात बाह्यरुग्ण विभाग (ओपीडी) सुरू करण्यात आला. त्यानंतर रुग्णालयात १०० खाटांची व्यवस्था करण्यात आली. सुरुवातीला किरकोळ उपचार सुविधा देण्यात येत होत्या. सध्या रुग्णालयात अनेक गंभीर आजारांवरील शस्त्रक्रिया देखील केल्या जातात. त्याचा कष्टकरी वर्गाला मोठ्या प्रमाणात फायदा होत आहे.

बेजबाबदारपणाचा कहर
रुग्णालयात सामान्य विभाग, शस्त्रक्रिया, दंत चिकित्सा, आपत्कालीन विभागांसह इतर विभागांत चांगल्या प्रतीचे उपचार दिले जातात. प्रशासकीय कामकाज पाहणाऱ्या कर्मचाऱ्यांना बसण्यासाठी स्वतंत्र विभाग कार्यरत आहे. वैद्यकीय क्षेत्रातील बदलत्या उपचार पद्धतीचा अवलंब करण्यासाठी रुग्णालयाचे अत्याधुनिकीकरण करण्यास रुग्णालय प्रशासनाच्या हालचाली सुरू आहेत. मात्र, रुग्णालयाची बांधकाम आणि अग्निरोधक परवान्यांची फाईल गहाळ झाल्याने रुग्णालयाचे अत्याधुनिकीकरण करण्यास राज्याच्या आरोग्य विभागाकडून परवानगी दिली जात नसल्याची माहिती आहे. बांधकाम आणि अग्निरोधक परवानगीची फाईल शोधण्यासाठी रुग्णालय प्रशासनाची पळापळ सुरू आहे.

‘आयसीयू’लाही अडथळे
ईएसआय रुग्णालयामध्ये १० खाटांची व्यवस्था असणारा अतिदक्षता विभाग सुरू करण्यात आला. हा विभाग तयार करुन एक वर्षाचा कालावधी उलटला तरी देखील त्याची सुरुवात करण्यास अडथळे येत आहेत. गंभीर रुग्णांना उपचार देण्यासाठी हा विभाग सुरू करण्यात येणार आहे. परंतु, बांधकाम आणि अग्निरोधक परवाना सापडत नसल्याने हा विभागही धूळखात पडला आहे.

ईएसआय रुग्णालयात अत्याधुनिक उपचार सुविधा सुरू करण्यात येत आहेत. त्यासाठी आवश्यक परवानगी मिळवण्याची प्रक्रिया अंतिम टप्प्यात आहे. बांधकाम आणि अग्निरोधक परवान्यांची फाईल मिळाली आहे. आता पहिल्या टप्प्यात आयसीयू सुरू केले जाईल. त्यानंतर परवानगी मिळेल; तसे इतर विभागांत दर्जेदार सेवा सुरू केली जाईल.
- डॉ. वर्षा सुपे, चिकित्सा अधीक्षक, ईएसआय रुग्णालय