अण्णा भाऊ साठे प्रबोधन पर्वाची महापालिकेकडून तयारी अधिकाऱ्यांकडून कार्यक्रम स्थळाची पाहणी

पिंपरी, ता. ११ ः पिंपरी-चिंचवड महापालिकेच्यावतीने साहित्यरत्न अण्णा भाऊ साठे यांच्या जीवनकार्यावर आधारित पाच दिवसीय विचार प्रबोधन पर्वाचे आयोजन करण्यात येणार आहे. या पार्श्वभूमीवर फ क्षेत्रीय कार्यालयाकडून कार्यक्रमाची तयारी करण्यात येत आहे. अधिकाऱ्यांनी आज निगडी येथील कार्यक्रम स्थळाची पाहणी केली.
क्षेत्रीय अधिकारी अतुल पाटील यांनी कार्यक्रम स्थळाचा आढावा घेतला तसेच कार्यक्रमपूर्व आणि कार्यक्रमादरम्यान आवश्यक असलेल्या स्थापत्य, स्वच्छता, विद्युत सुविधा, मंच रचना, वाहनतळ व्यवस्था, महिला व ज्येष्ठ नागरिकांसाठी सुलभ मार्ग आदी बाबींविषयी संबंधित विभागाच्या अधिकाऱ्यांशी चर्चा करून सूचनाही दिल्या. या पाहणी दरम्यान कार्यक्रम स्थळी उभारण्यात येणाऱ्या स्टेज, मंडप, प्रेक्षकांसाठी बैठक व्यवस्था, व्यासपीठाचे डिझाईन, चित्रफिती किंवा पोस्टर्स, कार्यक्रमस्थळी परिसराची स्वच्छता व डासमुक्ती याकडे विशेष लक्ष, कार्यक्रमापूर्वी आणि दररोज कार्यक्रमानंतर परिसराची स्वच्छता, वैद्यकीय सुविधा, अग्निशमन, पाणीपुरवठा आणि आपत्कालीन सुविधा यांची तयारी ठेवण्यात यावी, अशा सूचना क्षेत्रीय अधिकारी पाटील यांनी संबंधित अधिकाऱ्यांना दिल्या.
लोकशाहीर अण्णा भाऊ साठे यांच्या जीवनकार्यावर आधारित परिसंवाद, विचारवंत वक्त्यांचे व्याख्यान, निबंध व वक्तृत्व स्पर्धा, चित्रप्रदर्शन यांसारखे उपक्रमही राबविण्यात येतात. प्रबोधन पर्वात विविध सामाजिक संस्था, शाळा, महाविद्यालये यांचाही सहभाग असतो. यासंदर्भात चर्चा करण्यासाठी सोमवारी (ता. १४) दुपारी तीनला महापालिकेत आढावा बैठक घेण्यात येणार आहे, अशी माहिती अधिकाऱ्यांनी दिली. पाहणी दरम्यान मेट्रो व्यवस्थापनाचे व्यवस्थापक धनंजय कृष्णन, येतेंद्र कुलकर्णी, युवराज गावंडे, महापालिका स्थापत्य विभागाचे कार्यकारी अभियंता विजय वाईकर, साहित्यरत्न लोकशाहीर अण्णा भाऊ साठे जयंती उत्सव समितीचे अध्यक्ष बाळासाहेब रसाळ आदी उपस्थित होते.

--------