पोलिस ठाण्यांतील लॅण्डलाइन फोन शोभेपुरते

मंगेश पांडे ः सकाळ वृत्तसेवा
पिंपरी, ता. १३ : अडचणीतील नागरिकांना मदतीसाठी व इतर दैनंदिन कामकाजासाठी संपर्क साधायचा झाल्यास पोलिस ठाण्यांमध्ये शासनाकडून टेलिफोन उपलब्ध करून देण्यात आले आहेत. मात्र, पिंपरी चिंचवड पोलिस आयुक्तालयांतर्गत असलेल्या काही ठाण्यांतील टेलिफोन शुक्रवारी (ता. ११) बंद स्थितीत असल्याचे समोर आले. हे टेलिफोन पोलिस ठाण्यात नावापुरतेच असल्याचे दिसून आले. तर बहुतांश पोलिस ठाण्यांनी मोबाईलचा वापर सुरू केला आहे.
प्रत्येक पोलिस ठाण्याशी संपर्क साधण्यासाठी टेलिफोन गरजेचा असल्याने पोलिस आयुक्तालयासह विविध ठिकाणी ठाण्यांचे टेलिफोन क्रमांक प्रसिद्ध करण्यात आले आहेत. मात्र, टेलिफोनची लाईन वारंवार बंद पडणे अथवा काही ठिकाणचे फोन थकीत बिलामुळे बंद असल्याचेही बोलले जाते. परंतु, टेलिफोन बंद असले तरी इतर हेल्पलाइन क्रमांक उपलब्ध करून दिले असल्यामुळे नागरिकांना दिलासा मिळत आहे.

क्रमांक प्रसिद्ध; मात्र फोन बंद
पोलिस ठाण्यातील फलक, पोलिस आयुक्तालयाचे संकेतस्थळ यासह इतर ठिकाणीही संपर्कासाठीचे टेलिफोन क्रमांक प्रसिद्ध केले आहेत. मात्र, प्रत्यक्षात संपर्क साधला असता फोन बंद असतो, यामुळे नागरिकांची गैरसोय होते.

मोबाईल क्रमांकाचा पर्याय
आळंदी, बावधन, चाकण, देहूरोड, हिंजवडी, एमआयडीसी भोसरी, एमआयडीसी महाळुंगे, रावेत, तळेगाव एमआयडीसी, वाकड या ठाण्यांनी मोबाईल क्रमांक प्रसिद्ध केलेले आहेत.

हेल्पलाइन क्रमांक
११२ - तातडीच्या मदतीसाठी हेल्पलाइन
१४५६७ - ज्येष्ठ नागरिक हेल्पलाइन
१०९१ - महिलांसाठी हेल्पलाइन
१९३० - सायबर हेल्पलाइन
---------------

शुक्रवारी सायंकाळी संपर्क साधला असता त्यावेळची स्थिती
- टेलिफोन बंद असलेली पोलिस ठाणी - सायबर, सांगवी, संत तुकारामनगर, शिरगाव, तळेगाव दाभाडे
- टेलिफोन सुरू असलेली पोलिस ठाणी- चिखली, चिंचवड, दिघी, निगडी, पिंपरी
- मोबाईलचा वापर करत असलेली पोलिस ठाणी - आळंदी, बावधन, चाकण, देहूरोड, हिंजवडी, एमआयडीसी भोसरी, एमआयडीसी महाळुंगे, रावेत, तळेगाव एमआयडीसी, वाकड
- मोबाईल, टेलिफोन क्रमांकच उपलब्ध नसलेले पोलिस ठाणी - दापोडी, काळेवाडी
- टेलिफोन आहे मात्र, फोन उचलला नसलेले पोलिस ठाणे - भोसरी

सर्व टेलिफोन क्रमांक सुस्थितीत चालू आहेत अथवा नाही याची माहिती घेतली जाईल. काही टेलिफोन बंद असल्यास तातडीने दुरुस्ती केली जाईल.
- श्वेता खेडकर, पोलिस उपायुक्त, मुख्यालय, पिंपरी चिंचवड