लोन ॲपद्वारे फसवणूक प्रकरणी आरोपीला मुंबईमधून बेड्या लोन ऍपद्वारे अनेक नागरिकांची फसवणूक करणारा अटकेत

पिंपरी, ता. १२ : लोन ॲपद्वारे हजारो नागरिकांची फसवणूक करणाऱ्या आरोपीला पिंपरी चिंचवड पोलिसांच्या सायबर पोलिसांनी मुंबईतून अटक केली. या आरोपीकडील ॲपवरून देशभरात दहा हजारांपेक्षा अधिक तक्रारी प्राप्त झाल्या आहेत. या आरोपीने सिंगापूरमधील व्यक्तीच्या सांगण्यावरुन हे ॲप तयार केल्यास समोर आले आहे. एका महिलेने ॲपवर रक्कम भरण्यास नकार दिल्याने आरोपीने नातेवाईकांना तिचे मॉर्फ केलेले अश्लील फोटो पाठविले.
इसाकी राजन थेवर (वय २९, रा. वाशी, ठाणे, मूळ- तमिळनाडू) असे या आरोपीचे नाव आहे. फिर्यादी महिलेच्या व्हॉट्सअप नंबरवर क्रेडिट पायलट या नावाने लिंक पाठवून त्या लिंकद्वारे फिर्यादीचे मोबाईलचा संपूर्ण एक्सेस आरोपीने घेत फिर्यादीचे नावाने कर्ज काढले. फिर्यादी यांना वारंवार फोन करून त्याचे पैसे भरण्यास भाग पाडले. त्यानंतर कर्जाची रक्कम भरण्यास सांगितले. ती रक्कम भरण्यास फिर्यादीने नकार दिल्याने आरोपीने फिर्यादीचे नातेवाईकांना फिर्यादीचे मॉर्फ केलेले अश्लील फोटो पाठविले. आरोपीकडून १ मोबाईल, ५ लॅपटॉप, ७ सिमकार्ड व २ डेबीट कार्ड ताब्यात घेतले. क्रेडिट कीपर, इनलोन क्रेडिट, न्यू लोन, लिगालोन, फास्ट कॅश, हॅन्डीकॅश, इन्स्टा लोन या फ्रॉड लोन अॅपवरून लोकांची फसवणूक केल्याचे समोर आले.