काळजेवाडीत किराणा दुकानाचे शटर उचकटून चोरी

पिंपरी : किराणा दुकानाचे शटर उचकटून आत शिरलेल्या चोरट्यांनी साडेसात हजार रुपयांची रोकड चोरली. याप्रकरणी तिघांवर गुन्‍हा दाखल झाला असून पोलिसांनी दोघांना अटक केली आहे. ही घटना चऱ्होलीतील काळजेवाडी येथे घडली. याप्रकरणी नारायण बालाजी काचमवार (वय २५, रा. साई चौक, गंधर्व पार्क, काळजेवाडी) यांनी दिघी पोलिस ठाण्‍यात फिर्याद दिली आहे. त्यानुसार पोलिसांनी आकाश अरुण दोडके (वय २८, रा. गवळीवाडा, खडकी), मिलिंद कांबळे (वय २५), आणि सागर शर्मा (वय २०) या तिघांवर गुन्‍हा दाखल केला असून दोडके आणि कांबळे या दोघांना अटक केली आहे. आरोपींनी संगनमत करून फिर्यादी यांच्या श्री राजेश्‍वर ट्रेडर्स नावाच्या किराणा दुकानाचे शटर उचकटून दुकानात शिरले. काउंटरच्या ड्रॉव्हरमधील साडेसात हजार रुपये चोरून नेले.

जुन्या भांडणातून रिक्षा चालकाला बेदम मारहाण
पिंपरी : जुन्या भांडणाच्या रागातून रिक्षा चालकावर हातातील कड्याने हल्ला करून गंभीर जखमी केले. ही घटना मोशी येथे घडली. बालाजी महादेवराव बजगीरे (वय ५०, रा. पंचवटी हाउसिंग सोसायटी, शरदनगर, चिखली) असे जखमी रिक्षा चालकाचे नाव आहे. याप्रकरणी त्‍यांनी एमआयडीसी भोसरी पोलिस ठाण्‍यात फिर्याद दिली आहे. त्यानुसार पोलिसांनी विशाल शिंदे (वय २५, रा. घरकुल, चिखली) याच्यावर गुन्‍हा दाखल केला आहे. आरोपी विशाल शिंदे याने जुन्या भांडणाचा राग मनात धरून फिर्यादी बजगीरे यांना शिवीगाळ केली. तसेच हातातील कड्याने ओठावर व शरीरावर मारहाण केली. एमआयडीसी भोसरी पोलिस अधिक तपास करीत आहेत.

भरधाव बसच्‍या धडकेत पादचाऱ्याचा मृत्यू
पिंपरी : भरधाव खासगी बसने पादचारी व्यक्तीला जोरात धडक दिली. यामध्ये पादचाऱ्याचा मृत्यू झाला. ही घटना चिखली येथील पाटीलनगर परिसरात घडली. सीताराम शिंदे असे या अपघातात मृत्‍यू झालेल्या पादचारी व्‍यक्‍तीचे नाव आहे. याप्रकरणी त्‍यांचा मुलगा संतोष शिंदे (रा. पाटीलनगर, चिखली) यांनी चिखली पोलिस ठाण्‍यात फिर्याद दिली आहे. त्यानुसार पोलिसांनी अज्ञात बस चालकावर गुन्‍हा दाखल केला आहे. फिर्यादी यांचे वडील सीताराम हे रस्‍त्‍याने पायी चालले होते. त्‍यावेळी पाठीमागून भरधाव आलेल्‍या बसने त्‍यांना जोरदार धडक दिली. यात त्यांचा मृत्यू झाला.

पिस्तूल बाळगल्याप्रकरणी तरुणाला अटक
पिंपरी : बेकायदारित्‍या पिस्तूल बाळगल्‍याप्रकरणी एका तरुणाला गुन्हे शाखा युनिट चारच्या पथकाने अटक केली. ही कारवाई मारुंजी येथे करण्यात आली. सचिन मनोज दोडके (वय २३, रा. सरकार चौक, मारुंजी) असे अटक केलेल्‍या आरोपीचे नाव आहे. एका तरुणाकडे पिस्तूल असून तो मारुंजी येथे आल्याची माहिती पोलिसांना मिळाली. त्यानुसार पोलिसांनी सापळा रचून सचिन दोडके याला ताब्यात घेतले. त्याची अंगझडती घेतली असता त्याच्याकडे एक पिस्‍तूल व दोन जिवंत काडतुसे असा एकूण ५२ हजार रुपयांचा मुद्देमाल सापडला. हिंजवडी पोलिस अधिक तपास करीत आहेत.

पैसे घेऊनही काम पूर्ण न केल्याने दोघांवर गुन्हा
पिंपरी : कामासाठीचे पैसे घेऊनही काम पूर्ण न केल्याने दोघांवर गुन्हा दाखल झाला आहे. हा प्रकार मुकाई चौक, किवळे परिसरात घडला. याप्रकरणी सचिन दिनदयाल अगरवाल (रा. सेक्टर २९, रावेत) यांनी रावेत पोलिस ठाण्यात फिर्याद दिली आहे. त्यानुसार पोलिसांनी विक्रम मेहता आणि प्रणब डीओ (दोघेही रा. बंडगार्डन रस्ता, पुणे) यांच्यावर गुन्‍हा दाखल केला आहे. आरोपींनी फिर्यादी यांना एका ठिकाणी स्टॅक पार्किंग बसवून देण्यासाठी फिर्यादीकडून चेक आणि टीडीएस स्वरूपात एकूण ३५ लाख २५ हजार रुपये घेतले. मात्र, घेतलेले काम पूर्ण केले नाही व पैसे परत न करता फिर्यादी यांचा विश्वासघात केला.
---