उद्योगनगरीतून हवी प्रशस्त कनेक्टिव्हिटी

पिंपरी-चिंचवड उद्योगनगरीतून लोहगाव विमानतळाला जाण्यासाठी तीन मार्ग आहेत. मुंबई-पुणे महामार्गाने दापोडी- खडकी- येरवडा, भोसरी- दिघी- विश्रांतीवाडी आणि चऱ्होली- लोहगाव असे हे मार्ग आहेत. मुंबई-पुणे महामार्गावरील दापोडीपासून पुढे गेल्यावर बोपोडी व खडकी बाजार परिसरात अरुंद रस्ता असल्याने वाहतूक कोंडी होते. यातील बोपोडीचा भाग पुणे महापालिका तर खडकी परिसर कॅन्टोन्मेंट बोर्डाच्या हद्दीत येतो. त्यांनी रस्ता रुंदीकरण केल्यास हा मार्ग आणखी सोयीचा होईल. दिघी-विश्रांतवाडी मार्ग सोयीचा आहे. मात्र, भोसरीतील आळंदी फाटा चौक, दिघी मॅगझीन कॉर्नरपर्यंत आळंदी रस्त्यावर पथविक्रेते, फेरीवाल्यांचे अतिक्रमण असते. वाहने रस्त्याच्या कडेलाच उभी असतात. त्यामुळे वारंवार वाहतूक कोंडी होते. ती टाळण्यासाठी रुंदीकरण करणे किंवा अतिक्रमणे हटवून वाहनचालकांना शिस्त लावणे आवश्यक आहे किंवा दिघी रस्ता रुंदीकरण करून डीपी रस्ता निर्माण करणे आवश्यक आहे. तिसरा मार्ग चऱ्होली-लोहगाव अधिक सोयीचा आहे. मात्र, ९० मीटर रुंद रस्त्याचे काम लोहगाव हद्दीत रखडले आहे. शिवाय, अजिंक्य डी. वाय. पाटील विद्यापीठ रस्ता अरुंद व खासगी असल्याने मर्यादा येतात. चऱ्होलीतून धानोरीगाव रस्ता रुंदीकरण गरजेचा आहे. या तीनही रस्त्यांनी लोहगाव विमानतळाची कनेक्टिव्हिटी आहे. मात्र, ती अधिक प्रभावी व प्रशस्त करायला हवी.
---