हिंजवडीच्या प्रश्नासंबंधी विभागीय आयुक्तांकडे बैठक भाजपचे आमदार महेश लांडगे यांची माहिती

पिंपरी, ता. १३ ः हिंजवडी आयटी पार्क ‘कोंडीमुक्त’ करण्यासाठी मुख्यमंत्री देवेंद्र फडणवीस यांच्या आदेशानुसार विभागीय आयुक्त डॉ. चंद्रकांत पुलकुंडवार यांच्या उपस्थितीत पहिली आढावा बैठक होणार आहे, अशी माहिती भाजपचे आमदार महेश लांडगे यांनी दिली. दरम्यान, मुख्यमंत्र्यांच्या आदेशानंतर होत असलेल्या बैठकीकडे सर्वांचेच लक्ष लागले आहे.
‘आयटी हब’ हिंजवडी परिसर समस्यांनी ग्रासला आहे. येथील वाहतूक कोंडीचा प्रश्न सध्या ऐरणीवर आहे. या परिसरात दररोज सुमारे पाच लाखांहून अधिक आयटी व्यावसायिक ये-जा करतात. मात्र, अपुरी पायाभूत सुविधा, वाहतूक कोंडी, रस्त्यांची दुर्दशा आणि समन्वयाचा अभाव यामुळे रहिवासी व कर्मचाऱ्यांचे आयुष्य कठीण झाले आहे. याच पार्श्वभूमीवर ‘हिंजवडी आयटी पार्कला अडथळ्यांमधून मुक्त करा’ अशी मागणी परिसरातील नागरिक, आयटी फोरम, सोसायटी फेडरेशन यांनी केली होती. त्याबाबत आमदार लांडगे यांच्या पुढाकारातून मुख्यमंत्री देवेंद्र फडणवीस यांच्यासमवेत बैठक झाली. त्यामध्ये हिंजवडी आयटी पार्कबाबत मुख्यमंत्री फडणवीस यांनी प्रशासनाला कालबद्ध कार्यक्रम आखून दिला आहे. विभागीय आयुक्तांच्या माध्यमातून सिंगल पॉईंट एथॉरिटी हिंजवडीचे प्रश्न मार्गी लावतील, अशी सूचना केली होती. त्यानुसार तातडीने बैठक घ्यावी, अशी मागणी आमदार महेश लांडगे यांनी विभागीय आयुक्त डॉ. चंद्रकांत पुलकुंडवार यांच्याकडे केली आहे. त्यांची पहिली बैठक होणार असून, त्याकडे सर्वांचेच लक्ष लागले आहे.
---