लोकप्रतिनिधींच्या नाकर्तेपणामुळेच वाहतूक कोंडी

पिंपरी, ता. १४ ः तळेगाव - चाकण - शिक्रापूर या महामार्गाची खड्ड्यांमुळे दुरवस्था झाली असून महामार्गावर दिवसेंदिवस वाहतूक कोंडीची समस्या गडद होत आहे. एमआयडीसी परिसरातील आणि महामार्गावरील खड्डे, वाहतूक कोंडीमुळे नागरिक त्रस्त झाले आहेत. लोकप्रतिनिधींच्या नाकर्तेपणामुळेच हा प्रश्न प्रलंबित राहिल्याचा आरोप संतप्त नागरिकांनी केला आहे. तसेच या समस्यांवर त्वरित उपाययोजना न केल्यास आंदोलनाचा इशारा नागरिकांनी दिला आहे.
तळेगाव - चाकण - शिक्रापूर या महामार्गाची दुरवस्था आणि वाहतूक कोंडी याबाबत ‘सकाळ’ने रविवारी (ता. १३) ‘खड्ड्यांमुळे आजारांचा उद्योग’ या मथळ्याखाली वृत्त प्रसिद्ध केले होते. त्यावर उद्योजक, वाहनचालक आणि नागरिकांनी ‘सकाळ’कडे संतप्त प्रतिक्रिया व्यक्त केल्या आहेत. या समस्यांवर त्वरित उपाययोजना न केल्यास आंदोलनाचा इशारा नागरिकांनी दिला आहे.
गेल्या १० ते १५ वर्षांपासून तळेगाव - चाकण - शिक्रापूर महामार्ग रुंदीकरणाची चर्चा सुरू आहे. या काळात अनेक वेळा निविदा प्रसिद्ध झाल्या. उद्‍घाटने झाली. पण, प्रत्यक्ष कामाला काही सुरुवात झाली नाही. निवडणुका आल्या की रुंदीकरणाच्या चर्चांना उधाण येते. निवडणुकीचा मुद्दा होतो. पण, निवडणुका झाल्या की या चर्चा पुन्हा थंडावतात. तळेगाव, चाकण आणि शिक्रापूर या तीनही भागांतील स्थानिक आमदारही हा प्रश्‍न तडीस नेण्यास कमी पडत आहेत. तर खासदार अमोल कोल्हे या प्रश्‍नाकडे दुर्लक्ष करत आहेत. लोकप्रतिनिधी केवळ निवडणुकांसाठी नागरिकांना महामार्ग रुंदीकरणाचे गाजर दाखवतात, असा आरोप नागरिकांनी केला आहे.

वाचकांनी सुचविलेल्या उपाययोजना
- तळेगाव - चाकण - शिक्रापूर रस्ता रुंदीकरण
- वेगवेगळ्या मार्गांनी चाकणपर्यंत येणारी अवजड वाहतूक इतर मार्गाने वळविणे
- तळेगाव- चाकण रस्त्याला पर्यायी रस्ता निर्माण करणे
- महामार्गातील खुले असलेले दुभाजक बंद करणे
- वाहतूक नियंत्रण दिव्यांची यंत्रणा कार्यान्वित करणे
- महामार्गालगत साइड पट्टा तयार करणे, चौकातील रिक्षा थांबे हटविणे
- कार्यालयीन वेळेत सकाळी ९ ते ११ व संध्याकाळी ५ ते ७ वेळेत अवजड वाहनांना बंदी
- अतिक्रमण काढलेले ठिकाणी रस्ता तयार करणे

गेल्या दहा वर्षांपासून तळेगाव - चाकण - शिक्रापूर महामार्गावर वाहतूक कोंडी होत असूनही त्यावर काहीही उपाय करण्यासंदर्भात ठोस कार्यवाही केली गेलेली नाही. अनेकवेळा मंजुरी दिली गेली. उद्‍घाटने झाली; पण हा रस्ता मात्र कधीही झाला नाही. आताही तेच चालू आहे असे वाटते. लोकप्रतिनिधीच्या नाकर्तेपणामुळे अजूनही हा प्रश्‍न प्रलंबित आहे.
- अजित फाफळे, नागरिक

चाकणमधील कंपन्यांसाठी लागणारे व तयार झालेले मटेरिअल ने-आण करण्यासाठी वापरण्यात येणारी अवजड वाहने नियमित वाहतुकीसाठी नेहमीच डोकेदुखी ठरते. जोपर्यंत त्यावर उपाय शोधला जात नाही तोपर्यंत काहीच होणार नाही. - विकास रासकर, नागरिक

शिक्रापूर - चाकण महामार्गावर अपघात झाला; तर १० ते १५ किलोमीटरपर्यंत वाहनांच्या रांगा लागतात. एनएचआय खड्डे बुजवत नाही. महामार्गालगत दुकाने सुरू झाली आहेत. त्यांच्यावर काहीच होत नाही. तात्पुरती कारवाई न करता कायमस्वरुपी उपाययोजना केल्या पाहिजेत.
- योगेश मासाळकर, नागरिक