निगडी-आकुर्डी मार्गाची दैन्यावस्था

पिंपरी, ता. १५ ः निगडीपासून बजाज गेट समोरील आकुर्डीमार्गे पुण्याकडे जाणाऱ्या अत्यंत महत्त्वाच्या रस्त्याची दैन्यावस्था झाली आहे. हा रस्ता अत्यंत धोकादायक बनला आहे.
सततची खोदकामे आणि मेट्रोच्या कामामुळे अनेक ठिकाणी खड्डे पडले आहे. त्यामुळे पादचारी, दुचाकीस्वारांच्या जिवाला धोका निर्माण झाला आहे. मेट्रोशी संबंधित कामे सुरक्षिततेचा विचार न करता सुरू असल्याची स्थानिक नागरिकांची तक्रार आहे.
खड्डे, धूळ, वाहतूक कोंडी आणि अपूर्ण कामे अशा कारणांमुळे येथे दररोज छोटे अपघात होतात. कोंडीमुळे लोकांच्या वेळ आणि आरोग्यावर प्रतिकूल परिणाम होतो आहे. या मार्गावरून असंख्य महिला, शालेय विद्यार्थी, ज्येष्ठ नागरिक तसेच सामान्य कामगार प्रवास करतात. त्यामुळे हा रस्ता लवकरात लवकर सुरक्षित व्हावा, अशी अपेक्षा आहे.
---
प्रशासन आणि मेट्रो प्रकल्प यांच्यातील समन्वयाचा अभाव स्पष्टपणे दिसून येतो. रस्त्यावर कामांबाबत सूचना किंवा इशारा देणारे कोणतेही फलक नाहीत. वाहतूक नियंत्रण यंत्रणा, पथदिवे किंवा वैकल्पिक मार्गांची व्यवस्था नाही.
- सुनील कांबळे, निगडी
---
मेट्रोच्या कामामुळे अपघातांचा धोका वाढला आहे. अनेक महिलांना पाठदुखीचा त्रास वाढला आहे. प्रशासनाच्या उदासीनतेमुळे नागरिकांमध्ये तीव्र संताप आहे.
- अभिजित जाधव, ओटास्कीम
---
निगडी ते बजाज गेट आकुर्डी मार्गाची अवस्था दयनीय आहे. नुकताच खड्ड्यांमुळे अपघात होऊन काही महिलांना गंभीर दुखापत झाल्या.
- दत्तात्रय हिरणाईकस, निगडी
---
पावसाळा सुरु होऊनही रस्त्याची डागडुजी झालेली नाही. अशा स्थितीत नागरिकांच्या जिवाला आणि आरोग्याला धोका पोहोचत आहे. प्रशासनाच्या दुर्लक्षाचा नागरिकांना फटका बसतो आहे.
- सनी पवार, निगडी
---
नागरिकांच्या मागण्या
१. निगडी ते आकुर्डी रस्त्याचे तातडीने दुरुस्ती करावी
२. मेट्रो प्रकल्पाच्या ठिकाणी वाहतूक सुरळीत करण्यासाठी समांतर मार्ग व स्पष्ट सूचना फलक लावावेत
३. अपघात होणाऱ्या संभाव्य ठिकाणी वाहतूक नियंत्रक, वाहतूक नियंत्रण पथक असावे
४. अपघातप्रवण ठिकाणी योग्य सूचना लावाव्यात
५. पुणे मेट्रो, पीसीएमसी आणि स्थानिक नागरिक यांच्यात नियमित समन्वय बैठका आयोजित करून समस्यांवर तातडीने मार्ग काढावा
६. स्थानिक नागरिक, व्यापारी, पालक आणि वाहनचालक यांच्याकडून तक्रारी जाणून घेऊन त्यानुसार सुधारणा कराव्यात
-----