डेंगी प्रतिबंधासाठी महापालिकेकडून मोहीम

पिंपरी, ता. १४ ः पिंपरी-चिंचवड शहरात डेंगी, मलेरिया यांसारख्या डासजन्य आजारांना प्रतिबंध करण्यासाठी महापालिकेने ठोस पावले उचलली आहेत. औषध फवारणीपासून नोटिसा आणि थेट दंडात्मक कारवाईसह आरोग्य विभाग विविध उपाययोजना राबवीत आहे.
या मोहिमेच्या अंतर्गत घरोघरी तपासणी केली जात आहे. औद्योगिक व बांधकाम आस्थापनेही तपासली जात आहेत. यामध्ये डासांच्या उत्पत्तीला कारणीभूत ठरणाऱ्यांचा शोध घेऊन त्वरित कारवाई केली जात आहे, अशी माहिती आयुक्त शेखर सिंह यांनी दिली.
आतापर्यंतची कारवाई
- ४ लाख ६० हजारांहून जास्त घरांपैकी सुमारे आठ हजार ठिकाणी डासांच्या उत्पत्तीचे स्रोत आढळले
- २४.५ लाख पैकी ९,२०० कंटेनरमध्ये डासांच्या वाढीस पोषक स्थिती
- १०६६ भंगार दुकाने, १४८१ बांधकाम स्थळांची पाहणी
- ३१५९ ठिकाणांना नोटीस,
- ५०१ ठिकाणी थेट दंड
- आतापर्यंत १६.९२ लाख रुपयांचा दंड वसूल
---
जनजागृतीपर कार्यक्रम
- प्रत्येक घरात जनजागृतीपर माहितीपत्रकांचे वाटप
- शाळांमधून विद्यार्थ्यांना डास प्रतिबंधाबाबत प्रशिक्षण
- सार्वजनिक ठिकाणी विशेष स्वच्छता मोहीम
- प्रत्येक प्रभागात स्थानिक स्तरावर जनजागृती उपक्रमांचे आयोजन
---
महापालिकेने डासांच्या उत्पत्तीचा बंदोबस्त करण्यासाठी सर्व स्तरावर उपाययोजना सुरू केली आहे. डेंगी, मलेरियासारख्या आजारांवर मात करण्यासाठी नागरिकांचे सहकार्य महत्त्वाचे आहे.
- शेखर सिंह, आयुक्त, पिंपरी-चिंचवड महापालिका
-----