पिंपरी-चिंचवड पोलिसांची दोन टोळ्यांवर मकोका कारवाई

पान एकसाठी
--------------
पिंपरी, ता. १४ : पिंपरी-चिंचवड पोलिसांनी दोन गुन्हेगारी टोळ्यांवर महाराष्ट्र संघटित गुन्हेगारी नियंत्रण अधिनियमांतर्गत (मकोका) कारवाई केली.
हिंजवडी पोलिस ठाण्यात दाखल असलेल्या एका गुन्ह्याच्या तपासात एका टोळीचा छडा लागला. टोळीप्रमुख आशिष ऊर्फ बोना संतोष सोजवळ (वय २६, रा. कमळाबाई बहिरट चाळ, बोपोडी), शैलेश विकास सरोदे (वय २०, रा. सुभाष छाजेड नगर, बोपोडी), साहिल सलीम शेख (वय २०, रा. इंदिरानगर वसाहत, खडकी बाजार) आणि एक अल्पवयीन मुलगा (रा. बोपोडी) यांच्यावर नऊ गंभीर गुन्हे दाखल असल्याचे आढळून आले.
चिंचवड पोलिस ठाण्यात दाखल असलेल्या एका गुन्ह्याच्या तपासात दुसऱ्या टोळीचा छडा लागला. टोळीप्रमुख परवेज ऊर्फ सोनू जावेद मणियार (वय २४), राज सखाहरी गायकवाड (वय १९, दोघे रा. शिवाजीनगर, नाशिक), विलास प्रमोद विसपुते (वय ४०, रा. खुटवड नगर, सर्वेश्वर प्लाझा, अंबड लिंक रोड, नाशिक) यांच्यावर एकूण १८ गंभीर गुन्हे दाखल असल्याची नोंद आढळून आली.
या दोन्ही टोळ्यांनी अवैध मार्गाने आर्थिक फायदा मिळवण्याच्या उद्देशाने टोळीचे वर्चस्व व दहशत कायम ठेवण्यासाठी हिंसाचाराच्या मार्गाचा अवलंब केला. या गुन्हेगारांनी हिंजवडी, सांगवी, चिंचवड, खडकी, सिंहगड, भारती विद्यापीठ तसेच नाशिकमधील इंदिरानगर, गंगापूर, सरकारवाडा, अंबड अशा ठिकाणी अनेक गुन्हे केले. गंभीर दुखापत, जबरी चोरी, घरफोडी, फसवणूक, चोरी, बेकायदेशीर अग्निशस्त्रे व हत्यार जवळ बाळगणे अशा प्रकारचे गंभीर गुन्हे त्यांच्यावर दाखल आहेत.
----------------
१४ टोळ्यांवर कारवाई
पिंपरी-चिंचवड पोलिसांनी या वर्षात १४ संघटित गुन्हेगारी टोळ्यांमधील एकूण ६७ आरोपींवर मकोका कायद्यांतर्गत कारवाई केली आहे.
------------------