चांदखेड येथील गरजू विद्यार्थ्यांना शैक्षणिक साहित्याचे वाटप

सोमाटणे, ता. १५ : चांदखेड येथील न्यू इंग्लिश स्कूलमधील गरजू विद्यार्थ्यांना गणवेशासह शालेय साहित्याचे वाटप करण्यात आले. यामुळे त्यांच्या शिक्षणाचा मार्ग अधिक सुलभ झाला आहे.
या शाळेतील एकूण ११४ विद्यार्थ्यांची आर्थिक परिस्थिती हालाखीची असल्याने शिक्षणाचा खर्च करणे कठीण झाले होते. ही बाब संकल्प इन्फ्रास्ट्रक्चर प्रायव्हेट लिमिटेडचे प्रमुख संदीप तापकीर यांच्या लक्षात येताच त्यांनी स्वखर्चातून सर्व विद्यार्थ्यांना गणवेश, स्कूल बॅग, वह्या आणि इतर आवश्यक शालेय साहित्य उपलब्ध करून दिले. या शैक्षणिक साहित्याचे वाटप दिलासा सोशल फाउंडेशनचे प्रमुख उदय खांडके, माजी प्राचार्य शंकरराव वाल्हेकर, मुख्याध्यापक अजिनाथ ओगले, शाळा व्यवस्थापन समितीचे सदस्य संतोष आगळे आदींच्या उपस्थितीत करण्यात आले. या मदतीमुळे अनेक विद्यार्थ्यांना नव्या उत्साहाने शिक्षण सुरू ठेवता येणार आहे. पुढील शैक्षणिक टप्प्यांसाठी अशा गरजू विद्यार्थ्यांना मदतीचा हात देणाऱ्या दानशूर व्यक्तींची आवश्यकता असल्याचे मत यावेळी व्यक्त करण्यात आले.
---