निगडीत एक ऑगस्टपासून लोकशाहीर विचार प्रबोधन पर्व

पिंपरी, ता. १५ ः साहित्यरत्न लोकशाहीर अण्णा भाऊ साठे जयंतीनिमित्त त्यांच्या कार्याचा प्रचार व प्रसार करण्यासाठी एक ते पाच ऑगस्ट दरम्यान महापालिकेतर्फे विचार प्रबोधन पर्वाचे आयोजन केले आहे. त्याअंतर्गतसर्व कार्यक्रम निगडीतील भक्ती-शक्ती चौकात होतील, अशी माहिती अतिरिक्त आयुक्त तृप्ती सांडभोर यांनी दिली.
प्रबोधन पर्वासाठी शहरातील विविध संस्था, संघटना, नागरिकांच्या सूचनांचा विचार होईल, असेही त्यांनी सांगितले. महापालिकेच्या दिवंगत महापौर मधुकर पवळे सभागृहातीस बैठकीत त्या बोलत होत्या. कार्यक्रमाशी संबंधित महापालिका अधिकारी, पोलिस, मेट्रो प्रशासन, पीएमपी अधिकारी आणि लोकशाहीर अण्णा भाऊ साठे जयंती उत्सव समितीचे पदाधिकारी, शहरातील विविध सामाजिक संघटनांचे प्रतिनिधी यावेळी उपस्थित होते. यामध्ये महोत्सव समिती अध्यक्ष बाळासाहेब रसाळ, जेजुरी देवस्थानचे विश्वस्त अनिल सौंदडे, मेट्रो व्यवस्थापनाचे धनंजय कृष्णन, युवराज गावंडे, सामाजिक कार्यकर्ते भाऊसाहेब आडागळे, संदीपान झोंबाडे, नितीन घोलप, संजय ससाणे, युवराज दाखले, अरुण जोगदंड, सुनिल भिसे आदींचा समावेश होता.
उपायुक्त अण्णा बोदडे यांनी प्रास्ताविक केले. जनता संपर्क अधिकारी प्रफुल्ल पुराणिक यांनी आभार मानले.
---

बैठकीमध्ये प्राप्त सूचना
- उत्तम वक्त्यांची मार्गदर्शनपर व्याख्याने असावीत
- कार्यक्रम उत्कृष्ट व दर्जेदार असावेत
- शालेय विद्यार्थ्यांसाठी निबंध, चित्रकलेसह विविध स्पर्धा घ्याव्यात
- स्वच्छतेविषयी प्रभावी भूमिका बजावणाऱ्या स्वच्छतादुतांचा सन्मान करावा
- रोजगार मेळावा, परिसंवाद, महिलासांठी कार्यक्रम घ्यावा
- वृक्षारोपण मोहीम, आरोग्य तपासणी व रक्तदान शिबिर घ्यावे
---