निकृष्ट दर्जाच्या कामामुळेच रस्ता खराब

पिंपरी, ता. १५ ः निगडी ते चिंचवड रस्त्यावर प्रचंड खड्डे पडले आहेत. मात्र, त्यावरुन आता महापालिका आणि मेट्रो प्रशासनातच जुंपली आहे. निकृष्ट दर्जाच्या कामामुळेच रस्ता खराब झाला असून पाऊस उघडेपर्यंत काम करणे शक्य नसल्याची भूमिका मेट्रो प्रशासनाने घेतली आहे. तर रस्ता पूर्वी सुस्थितीत होता; मात्र मेट्रोचे काम सुरू झाल्यापासून प्रचंड खड्डे पडल्याचा दावा महापालिकेने केला आहे. मात्र, त्यामध्ये वाहनांची पुरती ‘वाट’ लागणार आहे.
पिंपरी ते भक्ती-शक्तीपर्यंत विस्तारित मेट्रो मार्गाचे काम सुरू झाले आहे. महापालिका प्रशासनाने मेट्रो कामासाठी निगडी ते पिंपरी रस्ता मेट्रो प्रशासनाकडे हस्तांतरीत केला आहे. मात्र त्याने सेवा रस्ता अरुंद झाला असून तेथे खड्डे पडले आहेत. पण, हा रस्ता दुरुस्त करायचा कोणी ? यावरून महापालिका प्रशासन आणि मेट्रो प्रशासन यांच्यात ‘तू-तू-मै-मै’ सुरू आहे. मेट्रोच्या कामासाठी पिंपरी ते निगडी रस्ता महामेट्रो प्रशासनाकडे हस्तांतरित केल्याचे महापालिका प्रशासनाने सांगितले; तर मेट्रोचे काम सुरू आहे तेथील रस्ता दुरुस्तीची जबाबदारी मेट्रोची असल्याचे सांगून उर्वरित रस्ता दुरुस्त करण्यावरून मेट्रो प्रशासनाने हात झटकले आहेत.
मेट्रोचे कार्यकारी संचालक हेमंत सोणावणे यांनी मंगळवारी (ता. १५) महापालिकेच्या कामावरच प्रश्‍नचिन्ह उपस्थित केले. सोनावणे म्हणाले, ‘‘महापालिकेने रस्त्याचे निकृष्ट दर्जाचे काम केले आहे. त्यामुळे तो उखडला आहे. पण, आता आम्हाला तो दुरुस्त करावा लागत आहे. पूर्ण पाऊस थांबल्याशिवाय रस्त्याचे काम करता येणार नाही. जेव्हा पाऊस थांबेल तेव्हा काम करु.’’

मागील वीस वर्षांपासून निगडी ते पिंपरी रस्ता सुस्थितीत होता. या रस्त्यावर खड्डे नव्हते. पण, मेट्रोचे काम सुरू झाल्यापासून रस्त्यावर प्रचंड खड्डे पडले आहेत. त्यांनी ते दुरुस्त करावेत.
- मकरंद निकम, मुख्य अभियंता, पिंपरी चिंचवड महापालिका

फोटो ३१६६४