‘पीएमआरडीए’च्या राखीव ३२ भूखंडांचा लिलाव

पिंपरी, ता. १५ : पुणे महानगर प्रदेश विकास प्राधिकरणातर्फे (पीएमआरडीए) वेगवेगळे ३२ सुविधा भूखंड देण्यात येणार आहेत. १९ विविध सेवांसाठी या भूखंडांचा लिलाव होणार आहे. हवेली, खेड, मावळ, मुळशी या तालुक्‍यांतील गावांमध्ये हे भूखंड मिळणार आहेत, अशी माहिती ‘पीएमआरडीए’च्‍या जमीन व मालमत्ता विभागाने दिली.

हवेली तालुक्‍यातील लोणीकंद-दोन, लोणी काळभोर-दोन, कोरेगाव मूळ-एक, नाणेकरवाडी ता. खेड- एक, मावळ : वराळे-चार, कान्हे-दोन, चांदखेड-एक, मुळशी : नांदे-दोन, भुकूम-दोन, भुगाव येथे चार, मारुंजी येथे चार, हिंजवडी, माण प्रत्‍येकी एक, पिरंगुट तीन, आंबडवेट आणि कासार आंबोली येथे प्रत्‍येकी एक या ठिकाणी हे भूखंड आहेत.

‘पीएमआरडीए’ने यापूर्वी देखील लिलाव पद्धतीने भूखंड काढले होते. वेगवेगळ्या चौरस फुटांमध्ये हे सुविधा भूखंड उपलब्ध आहेत. ‘पीएमआरडीए’ हद्दीत नव्याने इमारत व लोकवस्ती निर्माण होत आहेत. त्या अनुषंगाने त्यांना सुविधा पुरविण्यासाठी हे भूखंड असून, ते राखीव आहेत. प्रशासनाकडून अर्जाची मागणी करून तेथे होणाऱ्या सुविधांची माहिती यानुसार त्याचे वाटप करण्याची प्रक्रिया असणार आहे.

या सुविधांसाठी आरक्षण
उद्याने, क्रीडा संकुल, वाचनालय, रुग्णालय, कॅफेटेरिया, खरेदीसाठी दुकाने, वाहनतळ, शाळा, आरोग्य केंद्रे, हेल्थ क्लब, उप टपाल कार्यालय, पोलिस ठाणे, विद्युत उपकेंद्रे, एटीएम, बँका, इलेक्ट्रॉनिक सायबर लायब्ररी, खुला बाजार, योग केंद्र, बागा, पाणीपुरवठा, सांडपाणी व्यवस्थापन, निचरा, सार्वजनिक बांधकाम व अन्य उपयोगी सेवा, क्लब हाउस, अग्निशामक दल, ‘पीएमआरडीए’ कर्मचारी निवासस्थान व सार्वजनिक उपयोगासाठी जागा, विद्यार्थी वसतिगृह व कार्यरत महिलांचे वसतिगृह त्याचप्रमाणे ‘पीएमआरडीए’ आयुक्तांनी ठरविल्यानुसार इतर अतिरिक्त सार्वजनिक उपयोगाच्या सुविधा यांचा समावेश होतो.