पिंपरीत ७८ स्कूल बस चालकांना दणका

सकाळ वृत्तसेवा
पिंपरी, ता. १६ ः शहरात नियम धाब्यावर बसून विद्यार्थी वाहतूक करणाऱ्या बसचालकांना पिंपरी-चिंचवड प्रादेशिक परिवहन विभागाने (आरटीओ) दणका दिला. मोटार वाहन कायद्यातील नियमांचे उल्लंघन करणाऱ्या ७८ स्कूल बस आणि ३७ इतर वाहनांवर कारवाई करण्यात आली. त्याचबरोबर १० लाख ३८ हजार रुपयांचा दंडही वसूल करण्यात आला.
शहरात खासगी आणि महापालिकेच्या मिळून ६६५ प्राथमिक, उच्च माध्यमिक शाळा आहेत. यात सुमारे अडीच लाख विद्यार्थी शिक्षण घेतात. असंख्य विद्यार्थ्यांना खासगी बस, स्कूल व्हॅनने जावे लागते.
पिंपरी-चिंचवड प्रादेशिक परिवहन विभागाकडे तीन हजार १९५ स्कूल बसची नोंद आहे. बसव्यतिरिक्त व्हॅन आणि रिक्षांमधूनही विद्यार्थांची वाहतूक केली जाते. यातील बहुतांश वाहनांतून क्षमतेपेक्षा जास्त विद्यार्थांची वाहतूक होत असल्याचे उघडपणे दिसते.
---
‘आरटीओ’चा आदेश धाब्यावर
याशिवाय शालेय विद्यार्थ्यांवरील लैंगिक अत्याचाराच्या गुन्ह्यांचे प्रमाण वाढले आहे. त्यामुळे परिवहन विद्यार्थ्यांची वाहतूक करणाऱ्या वाहनांमध्ये ‘सीसीटीव्ही’ आणि ‘ट्रॅकिंग’ प्रणाली बसविणे बंधनकारक केले आहे. त्यानंतरही बऱ्याच वाहनांमध्ये याची पुर्तता झालेली नाही. असंख्य वाहनचालकांनी ‘आरटीओ’ आदेश धाब्यावर बसविल्याचे दिसते.
---
वायुवेग पथक सक्रिय
परिवहन विभागाच्या वायूवेग पथकाकडून विद्यार्थी वाहतूक करणारी वाहने थांबवून वाहनांची तपासणी केली जाते. एक एप्रिल ते ३० जूनदरम्यान विशेष तपासणी मोहिमेत २३७ बस आणि १११ इतर वाहनांची तपासणी झाली. यात विनापरवाना अथवा परवान्याच्या अटींचा भंग करणे, योग्यता प्रमाणपत्र नसणे, वाहनात बेकायदेशीर फेरबदल करणे, क्षमतेपेक्षा जास्त विद्यार्थ्यांची वाहतूक करणे, कर न भरणे अशा नियमांचे उल्लंघन करणाऱ्या झाल्याचे दिसले. त्यामुळे ७८ स्कूल बस आणि ३७ इतर स्कूल वाहनांवर कारवाई करण्यात आली.
-----
शालेय बस ः ३,१९५
‘आरटीओ’कडून तपासणी ः २३७
नियमांचे उल्लंघन ः ७८
दंडात्मक कारवाई ः १० लाख ३८ हजार
-----------
‘आरटीओ’ आरटीओच्या वायुवेग पथकांमार्फत शहरातील विविध ठिकाणी शालेय बसची तपासणी करण्यात आली. यात अनेक वाहनांनी मोटार वाहन कायद्यातील नियमांचे उल्लंघन केल्याचे आढळले. त्यांच्यावर दंडात्मक कारवाई करण्यात आली आहे.
- राहुल जाधव, उपप्रादेशिक परिवहन अधिकारी, पिंपरी-चिंचवड ‘आरटीओ’
----