रस्ता दुरुस्तीला तब्बल दशकभरानंतर मुहूर्त

सोमाटणे, ता. १७ : चांदखेड-दारुंब्रे रस्त्याची दुरुस्ती तातडीने सुरू करण्याचे आदेश तहसीलदार विक्रम देशमुख यांनी सार्वजनिक बांधकाम विभागाला दिले आहेत. तर, कामाला विरोध केल्यास कायदेशीर कारवाई करण्याचा इशाराही त्यांनी दिला आहे. यामुळे तब्बल दशकभरानंतर या रस्ता दुरुस्तीला मुहूर्त मिळणार आहे. दरम्यान, या स्थितीचे वृत्त ‘सकाळ’ने प्रसिद्ध करताच प्रशासनाला जाग आली आहे.
काही शेतकऱ्यांकडून अडवणूक केली जात असल्याने चांदखेड-दारुंब्रे या रस्त्याचे काम मागील दहा वर्षांपासून अपूर्ण आहे. त्यामुळे दरवर्षीच्या पावसाळ्यात रस्त्याच वाहून जातो. याच रस्त्याने शालेय विद्यार्थ्यांना प्रवास करावा लागतो. प्रसंगी सायकल डोक्यावर घेऊन खड्डे पार करत जावे लागते. दारुंब्रे, चांदखेड या दोन गावांतील वाहनचालकांना चांदखेडहून दारुंब्रे गावाला जाण्यासाठी मुळशी तालुक्यातील कासारसाई गावाला वळसा घालून जावे लागते. यात त्यांचा नाहक वेळ आणि इंधनाचा अपव्यय होत आहे. याबाबतचे वृत ‘सकाळ’मध्ये प्रकाशित झाल्यानंतर मावळचे तहसीलदार विक्रम देशमुख यांनी सार्वजनिक बांधकाम विभागाचे उपअभियंता राधिका वाघोले, सरपंच मीना माळी, दत्तात्रेय माळी, ग्रामपंचायत सदस्य, ग्रामस्थ यांच्यासह या रस्त्याची पाहणी केली. हे काम पूर्ण झाल्यानंतर दारुंब्रे, चांदखेडच्या नागरिकांना जवळचा मार्ग उपलब्ध होणार आहे.

PNE25V32120