महिला कृषी प्रशिक्षणास आढले (खुर्द) येथे उत्स्फूर्त प्रतिसाद

सोमाटणे, ता. १८ : आढले (खुर्द) येथे महिलांसाठी आयोजित एक दिवसीय भात उत्पादन प्रशिक्षण कार्यक्रमास महिलांचा उत्स्फूर्त प्रतिसाद लाभला. महाराष्ट्र शासनाच्या कृषी विभाग व कृषी तंत्रज्ञान व्यवस्थापन यंत्रणा (आत्मा), पुणे यांच्या वतीने हे प्रशिक्षण पार पडले.
बदलत्या हवामानाचा विचार करून आधुनिक शेती तंत्रज्ञानाचा वापर करून भाताचे अधिक उत्पादन काढता यावे, या उद्देशाने हे प्रशिक्षण आयोजित करण्यात आले होते. कृषी अधिकारी मारुती साळे व प्रकल्प संचालक सूरज मडके यांच्या मार्गदर्शनाखाली या कार्यक्रमाचे आयोजन झाले. प्रशिक्षणामध्ये भात बियाणांची निवड, रोपे तयार करणे, भात लावणीचे तंत्र, युरिया ब्रिकेटचा वापर, खत व पाणी व्यवस्थापन, एकात्मिक किड व रोग व्यवस्थापन, काढणी व विक्री नियोजन यावर सखोल मार्गदर्शन करण्यात आले. सहभागी महिलांना प्रत्यक्ष प्रात्यक्षिकांद्वारे प्रशिक्षण देण्यात आले. या प्रशिक्षणात कृषी सहाय्यक एम.बी. घोडके, एस. एस. कानडे व राहुल घोगरे यांनी मार्गदर्शन केले. सरपंच नंदा भालेसाईन यांच्या पुढाकाराने महिलांनी मोठ्या संख्येने सहभाग नोंदवून प्रशिक्षण यशस्वी केले.
---