दुबईत ग्लोबल आंत्रप्रेन्युअर्स कॉन्क्लेव्ह होणार

पिंपरी, ता.१७ ः आंतरराष्ट्रीय पातळीवर शिक्षण क्षेत्रात अल्पावधीत उत्तुंग भरारी घेतलेल्या पिंपरी चिंचवड विद्यापीठ व इतर संस्थांच्यावतीने पुढील महिन्यात दुबईमध्ये ग्लोबल आंत्रप्रेन्युअर्स कॉन्क्लेव्हचे (जीईसी) आयोजन करण्यात आले आहे.
राज्याचे उद्योग मंत्री उदय सामंत यांच्या हस्ते जीईसीचे उद्‍घाटन होणार आहे. राज्य आणि आखाती देशातील उद्योग, व्यवसायांना चालना मिळण्यासाठी यादृष्टीने पिंपरी चिंचवड युनिर्व्हसिटी, राज्य आर्थिक विकास मंडळ, गर्जे मराठी ग्लोबल आणि सावा हेल्थकेअर लिमिटेड यांच्या संयुक्त विद्यमाने वरील परिषदेचे आयोजन करण्यात आले आहे. सावा हेल्थ केअर लिमिटेडचे अध्यक्ष विनोद जाधव यांच्या मार्गदर्शनाखाली आणि उद्योग विभागाच्या सहकार्यातून ही परिषद होणार आहे. या परिषदेच्या माध्यमातून भारत आणि आखाती देशांतील उद्योजकांना एकमेकांशी संवाद साधत औद्योगिक संकल्पनांचे आदान प्रदान करता येणार आहे. त्यातून औद्योगिक विकासाला चालना मिळेल. उद्योग क्षेत्रातील जागतिक पातळीवरील धोरणे, आर्थिक नियोजन या विषयी नवउद्योजकांना ज्येष्ठ व्यावसायिकांचे मार्गदर्शन मिळणार आहे, अशी माहिती राज्य आर्थिक विकास मंडळाचे उपाध्यक्ष आणि जीईसीचे समन्वयक सचिन ईटकर व पिंपरी चिंचवड युनिर्व्हसिटीचे कार्यकारी संचालक डॉ. गिरीश देसाई यांनी दिली.
ज्येष्ठ शास्त्रज्ञ डॉ. रघुनाथ माशेलकर, सकाळ माध्यम समूहाचे अध्यक्ष प्रतापराव पवार, संदीप वासलेकर, माजी मंत्री हर्षवर्धन पाटील, पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्मा भोसले, सचिव विठ्ठल काळभोर, खजिनदार शांताराम गराडे आणि सावा हेल्थकेअर लिमिटेड चे अध्‍यक्ष विनोद जाधव यांच्या मार्गदर्शनाखाली या ग्लोबल आंत्रप्रेन्युअर्स कॉन्क्लेव्हचे आयोजन करण्यात आले आहे. राज्य आर्थिक विकास मंडळाचे अध्यक्ष अतुल शिरोडकर, गर्जे मराठी ग्लोबलचे संस्थापक आनंद गानू तसेच दुबई येथील उद्योग क्षेत्रात काम करणाऱ्या अनेक संस्था आयोजनासाठी कार्यरत आहेत.