पाच दिवसांपासून धान्य वाटप ठप्प

पिंपरी, ता. १८ : शहरातील शिधापत्रिकाधारकांसाठी धान्यवाटपाचा प्रश्न सातत्‍याने निर्माण होत आहे. ई-पॉस यंत्रामधील निर्माण होणाऱ्या तांत्रिक अडथळ्यांमुळे गेल्या पाच दिवसांपासून धान्य वाटप पूर्णपणे ठप्प झाले आहे. परिणामी, साडेतीन लाख शिधापत्रिकाधारकांचे हाल होत असून, अडीचशेच्यावर स्वस्त धान्य दुकानदारांना शिधापत्रिकाधारकांच्‍या रोषाला सामोरे जावे लागत आहे. तर राज्‍यभरातूनच ही समस्‍या निर्माण झाली असून, दोन दिवसांत प्रक्रिया सुरू होईल, अशी माहिती अधिकारी देत आहेत.

शासनाने जून ते ऑगस्ट या कालावधीत तीन महिन्यांचे धान्य एकत्र करून वाटप करण्याच्या सूचना दिल्या होत्या. मात्र, प्रत्यक्षात दोनच महिन्यांचे धान्य दुकानांमध्ये पोचले आहे. ते वाटप करत असतानाच ई-पॉस यंत्रात पुन्हा अडथळे आल्याने शिधापत्रिकाधारकांचा संताप उफाळून आला आहे. पावसाळ्यात लोकांची गैरसोय होऊ नये यासाठी केलेली योजनेला प्रत्यक्षात तांत्रिक बिघाडांमुळे विलंब होत असल्याचे स्पष्ट झाले आहे. मागील महिन्यातही तब्बल १० ते १५ दिवस ई-पॉस यंत्र बंद पडल्याने धान्य वाटप बंद राहिले होते. त्यावेळी शासनाकडून ‘तांत्रिक अडचणी दूर झाल्या’ असल्याचे सांगण्यात आले होते. मात्र, प्रत्यक्षात समस्या कायम आहेत. त्यामुळे धान्य वाटप नेमके सुरळीत कधी होणार, असा सवाल नागरिक विचारत आहेत.

शहरातील सर्वच स्वस्त धान्य दुकानदार सध्या त्रस्त झाले असून, धान्य घेण्यासाठी दुकानांवर येणाऱ्या शिधापत्रिकाधारकांना वारंवार रिकाम्या हाताने परतावे लागत आहे. शासनाने या तांत्रिक अडचणी कायमस्वरूपी सोडवून नागरिकांना पुरेशा प्रमाणात आणि वेळेत धान्य मिळेल याची खात्री द्यावी, अशी मागणी जोर धरू लागली आहे.

धान्‍य वाटप थांबले असल्‍याची माहिती स्‍वस्‍त धान्‍य दुकानदारांनी दिली. ही समस्‍या कायम होत आहे. यावर कायमस्‍वरूपी योग्य तोडगा काढायला हवा. धान्‍य वाटप थांबले तर अधिकचा खर्च करून धान्‍य घ्यावे लागत आहे.
- किसन जाधव, चिंचवड

ई-पॉस यंत्रात तांत्रिक बिघाड निर्माण झाल्‍याने धान्‍यवाटप पाच दिवस थांबले आहे. शिधापत्रिकाधारक रोज येऊन विचारत आहेत. वादावादीचे प्रसंग उद्धभवत आहेत.
- विक्रम छाजेड, स्‍वस्‍त धान्‍य दुकानदार

तीन महिन्‍यांचे धान्‍य वाटप सुरू असल्‍याने ई-पॉस यंत्रावर ताण आला आहे. त्‍यामुळे या यंत्रात तांत्रिक अडथळे निर्माण होण्याची समस्‍या राज्‍यभरात झाली आहे. त्‍यावर कार्यवाही सुरू आहे. दोन दिवसात ही समस्‍या सुटेल.
- प्रशांत खताळ, अन्‍नधान्‍य वितरण व पुरवठा अधिकारी