वाचक लिहीतात

घातपाताचीही शक्यता विचारात घ्या
अहमदाबाद येथील विमान अपघाताची चौकशीच नव्हे; तर संशोधन चालू आहे. पण, या सर्व तपासण्यांमध्ये घातपाताची शक्यता विचारात घेतली गेली नाही, असे मला वाटते. इंधन स्विच बंद पडण्यास विमानात बसलेल्या आत्मघाती प्रवाशाकडून रिमोट कंट्रोलने आज्ञा दिली गेली असेल का? हेही विचारात घेतले पाहिजे. स्वीचजवळ सेन्सर बसविणे अशक्य वाटते; तर अशा अवस्थेत विमानाची तपासणी करताना इंधन पुरवठा यंत्रणेजवळ काही छेडछाड ग्राऊंड स्टाफ कडून केली गेली असेल का? या बाबीही तपासून पाहिल्या गेल्या पाहिजेत.
- पुरुषोत्तम काबरा, जुनी सांगवी

स्वच्छतागृह खुले करा
वाकडच्या कावेरीनगर पोलिस वसाहती जवळील भाजी मंडई येथील महापालिकेने बांधलेले स्वच्छतागृह बऱ्याच दिवसांपासून बंद असल्याने परिसरातील व्यापारी व नागरिकांची गैरसोय होत आहे. तरी कुलूपबंद असलेले स्वच्छतागृह नागरिकांसाठी लवकरात लवकर खुले करण्यात यावे. महापालिका प्रशासनाने याकडे लक्ष द्यावे.
- सुहास होनराव, चिंचवड

कचरा वाहतूक वाहने बंदिस्त हवीत
चिकन, मटणच्या दुकानातून टाकाऊ कचरा घेऊन जात असताना वाहनामधून संपूर्ण रस्त्यावर दुर्गंधी पसरते. शिवाय कावळ्यांचे थवेच्या थवे वाहनाबरोबर असतात. तरी ही दुर्गंधीयुक्त वाहने बंदिस्त असू शकत नाहीत का ? अशी धोकादायक वाहतूक कितपत योग्य आहे ? तरी संबंधित अधिकाऱ्यांनी याची दखल घेऊन योग्य ती उपाययोजना करण्यात यावी. हीच अवस्था जिवंत कोंबड्यांची निर्दयीपणे वाहतूक करणाऱ्या वाहनांची असते. अशा दुर्गंधीयुक्त वाहनांच्या मागून प्रवास म्हणजे अत्यंत किळसवाणा ठरत असतो.
- सिद्धेश बोऱ्हाडे, काळेवाडी