बचाव कौशल्यांचे कर्मचाऱ्यांना प्रशिक्षण

पिंपरी, ता. १९ : महापालिका अग्निशमन विभागाच्यावतीने यंत्रसामग्री, उपकरणे आणि वाहनांची कार्यक्षमता तपासण्यासाठी तसेच नव्याने नियुक्त अधिकारी आणि कर्मचाऱ्यांना आपत्कालीन परिस्थिती हाताळण्यास सक्षम करण्यासाठी विशेष उजळणी आणि प्रशिक्षण सत्र घेण्यात आले.
या प्रशिक्षण सत्रात अग्निशमन सेवेत नुकतेच सरळसेवेने नियुक्त झालेले अधिकारी, कर्मचारी तसेच कार्यरत अनुभवी कर्मचारी सहभागी झाले. त्यामध्ये अग्निशमन सेवा, आपत्ती व्यवस्थापन, घटनास्थळी त्वरित कृती, तांत्रिक कौशल्ये आणि विविध उपकरणांच्या वापराबाबत सैद्धांतिक व प्रात्यक्षिक प्रशिक्षण देण्यात आले. सत्रात धावणे, शारीरिक शिक्षण, स्कॉट ड्रिल, बचाव उपकरणे, रोप रॅपलिंग, न्यूमॅटिक एअर लिफ्टिंग बॅग, हायड्रॉलिक उपकरणे, आस्का लाइट, बीए सेट आणि बीए व्हॅन तसेच अंडर वॉटर कॅमेरा, बोटिंग, लिफ्ट रेस्क्यू, ईव्ही फायर, क्लोरीन गळती रेस्क्यू, गॅस डिटेक्टर, सीपीआर, हायड्रॉलिक प्लॅटफॉर्म, फोम टेंडर इत्यादी प्रत्यक्ष सरावाद्वारे शिकविण्यात आले. याशिवाय शहराची टोपोग्राफी, हॉस्पिटल आणि मॉल व्हिजिट, फायर सप्रेशन सिस्टम, फायर पंप आणि विविध ड्रिल्सही सत्राचा भाग होते. उपअग्निशमन अधिकारी विकास नाईक आणि रुपेश जाधव यांनी मार्गदर्शन केले.

अग्निशमन कर्मचाऱ्यांची क्षमता वृद्धिंगत होण्यासाठी प्रशिक्षण सत्रांची गरज आहे. आधुनिक उपकरणांचा योग्य वापर आणि तांत्रिक कौशल्ये बचावाची गुरुकिल्ली आहे. विभागाच्या सर्व कर्मचाऱ्यांनी या सत्रात सहभाग घेतला.
- उमेश ढाकणे, सहाय्यक आयुक्त, अग्निशमन विभाग, पिंपरी चिंचवड महापालिका

हे प्रशिक्षण आमच्यासाठी खूप उपयोगी ठरले. थेट सरावामुळे आत्मविश्वास वाढला. आपत्कालीन प्रसंगी योग्य पद्धतीने काम करण्याचे मार्गदर्शन मिळाले.
- प्रथमेश भोसले, अग्निशमन कर्मचारी