निघोजे येथे तरुणावर चाकूने वार

पिंपरी : तरुणीला मैसेज केल्याच्या रागातून एका तरुणावर चाकूने वार केला. ही घटना निघोजे येथील अँटोलिन लाइटिंग या कंपनीत घडली. शरद जगन्नाथ लूचारे (रा. हनुमान चौक, कुरुळी) असे या घटनेत जखमी झालेल्या तरुणाचे नाव आहे. याप्रकरणी त्यांनी महाळुंगे एमआयडीसी पोलिस ठाण्यात फिर्याद दिली आहे. त्यानुसार पोलिसांनी शैलेश वसंत हिवाळे (वय २४, रा. देहू) याला अटक केली आहे. आरोपी शैलेश हिवाळे याने फिर्यादी शरद लूचारे यांना ‘तू एका तरुणीला का मैसेज केला’ असे विचारले. त्यानंतर त्यांच्या तोंडावर चापट मारत ‘तुला जीवे मारतो’ अशी धमकी दिली. आरोपीने चाकू काढून शरद यांच्या छातीवर वार करण्याचा प्रयत्न केला. मात्र, शरद हे बाजूला सरकल्याने चाकू त्यांच्या डाव्या हाताच्या दंडाला लागला आणि त्यांना आठ टाके पडले.

डंपरच्या धडकेत दुचाकीस्वार महिलेचा मृत्यू
पिंपरी : भरधाव डंपरने दुचाकीला पाठीमागून धडक दिल्याने दुचाकीवरील महिलेचा मृत्यू झाला आहे. ही घटना दिघीतील काळे कॉलनी येथे घडली. शीतल रोहन दगडे (रा. वडजाई वस्ती, आव्हाळवाडी) असे या अपघातात मृत्यू झालेल्या महिलेचे नाव आहे. या प्रकरणी रोहन विष्णू दगडे यांनी दिघी पोलिस ठाण्यात फिर्याद दिली आहे. त्यानुसार पोलिसांनी सोहन रामकिसन पासवान (वय २७, रा. बारगळवस्ती, लोणीकंद) याच्यावर गुन्हा दाखल केला आहे. फिर्यादी रोहन दगडे आणि त्यांची पत्नी शीतल हे त्यांच्या दुचाकीवरून जात असताना, भरधाव आलेल्या डंपर चालकाने दगडे यांच्या गाडीला पाठीमागून जोरात धडक दिली. या अपघातात रोहन यांच्या पत्नी शीतल यांचा मृत्यू झाला. अपघातानंतर ट्रक चालक घटनास्थळावरून पसार झाला.

भरधाव टेम्पोच्या धडकेत दुचाकीस्वार जखमी
पिंपरी : भरधाव अज्ञात टेम्पोने पाठीमागून दिलेल्या धडकेत दुचाकीस्वार गंभीर जखमी झाला. ही घटना काळेवाडीतील विजयनगर बस थांब्याजवळ घडली. नागेश गणेश डोके (रा. मोरया रेसिडेन्सी, थेरगाव) असे या अपघातात मृत्यू झालेल्या दुचाकीस्वाराचे नाव असून त्यांनी काळेवाडी पोलिस ठाण्यात फिर्याद दिली आहे. त्यानुसार पोलिसांनी अज्ञात टेम्पो चालकावर गुन्हा दाखल केला आहे. फिर्यादी नागेश डोके हे त्यांच्या दुचाकीवरून काळेवाडी फाट्याहून घराकडे जात होते. दरम्यान, त्यावेळी नढे कॉर्नर येथे एका अज्ञात टेम्पोने त्यांना पाठीमागून जोरात धडक दिली. या अपघातात नागेश यांच्या डोक्याला, ओठाला, डाव्या हाताला आणि डाव्या गुडघ्याला गंभीर दुखापत झाली.
---