निगडीतील दरोड्यामुळे नागरिक भयग्रस्त

पिंपरी, ता. २० ः निगडी-प्राधिकरणातील बिग इंडिया चौकात शनिवारी (ता. १९) रात्री सशस्त्र चोरट्यांनी चंद्रभान छोटूराम अग्रवाल यांच्या बंगल्यावर दरोडा घातला. उच्चभ्रू सोसायटीच्या परिसरात रात्री नऊच्या सुमारास घडलेल्या या प्रकाराने नागरिकांमध्ये खळबळ उडाली आहे.
धक्कादायक बाब म्हणजे पोलिस ठाणे हाकेच्या अंतरावर असूनही चोरटे पसार झाल्याने आश्‍चर्य व्यक्त केले जात आहे. चार चोरट्यांनी घरात प्रवेश करण्यापूर्वी आधी पार्किंगमधील चार चाकी वाहनाची हवा सोडली. सुरक्षारक्षकांना चाकू आणि बंदुकीचा धाक दाखवून त्यांचे हातपाय बांधण्यात आले. त्यानंतर घरात प्रवेश करून अग्रवाल यांचेही हातपाय बांधून त्यांना शस्त्राचा धाक दाखवीत सोनसाखळी व दोन घड्याळे हिसकावण्यात आली. त्यानंतरही अग्रवाल यांनी धाडसाने गॅलरीपर्यंत धाव घेऊन आरडाओरड केली. त्यामुळे परिसरातील नागरिक धावत घटनास्थळी जमा झाले. त्यामुळे चोरटे पळून गेले.
या प्रकारानंतर पोलिस आणि अग्निशामक दलाचे जवान घटनास्थळी दाखल झाले. पोलिसांनी परिसराची तपासणी केली. सुरवातीला चोरटे अजूनही घरात लपलेले असावेत अशा अंदाजाने मोठ्या प्रमाणावर पोलिस बंदोबस्त ठेवण्यात आला होता. तपासाअंती चोरटे घटनास्थळावरून पसार झाल्याचे स्पष्ट झाले.
या परिसरातील ‘सीसीटीव्ही फुटेज’च्या आधारे पोलिसांचा तपास सुरू आहे. या प्रकाराने निगडी प्राधिकरणातील सुरक्षेचा प्रश्‍न ऐरणीवर आला आहे.

सोशल मीडियावर व्हायरल

परिसरातील नागरिकांना घटनेची माहिती मिळताच इन्स्टाग्राम, फेसबुकवर घटनास्थळाच्या परिसराच्या चित्रफिती टाकल्या. त्यामुळे बघ्यांची गर्दी झाली. रात्री दोन-तीन वाजेपर्यंत या परिसरात गर्दी होती. अखेर पोलिसांनी रात्री उशिरा गर्दी पांगविली.

परिसरात भितीचे वातावरण

पोलिस यंत्रणा कुचकामी ठरत असल्याची चर्चा नागरिकांमध्ये यावेळी होती. घरातील ज्येष्ठांना एकटे सोडू नये, घराचे दरवाजे रात्री लवकर बंद करावेत असे नागरिक म्हणत होते. रहदारीच्या रस्त्यावरील बंगल्यात चोरट्यांनी प्रवेश केल्याने नागरिकांमध्ये भितीचे वातावरण आहे.
----

यावेळी ज्येष्ठ नागरिक एकटेच घरात होते. त्यावेळी चोरटे आले. त्यांनी अग्रवाल यांना एका खोलीत बंद केले. चोरट्यांनी कपाट उघडून काही वस्तूंची चोरी केली. त्यांच्याकडे शस्त्रे होती. घटनेचे गांभीर्य पाहून त्वरित छडा लावण्यात येईल.
- डॉ. शिवाजी पवार, पोलिस उपआयुक्त विशेष शाखा, गुन्हे
..
-----