केवळ गंभीर गुन्ह्यांची दखल, बाकी बेदखल

पिंपरी, ता. २१ : पोलिस ठाण्यात गुन्हा दाखल झाल्यानंतर त्यातील केवळ गंभीर गुन्ह्यांची दखल घेऊन पोलिस त्याचा कसून तपास करीत आहेत. त्यामुळे इतर गुन्हे कागदोपत्री नोंद होण्यापुरतेच मर्यादित राहत असल्याचे चित्र आहे. असे होत असल्याने इतर गुन्हे उघडकीस येण्याचे प्रमाणही अत्यल्प असल्याचे समोर येते. त्यामुळे पोलिस प्रशासनाने गंभीर गुन्ह्यांसह इतर गुन्ह्यांचीही दखल घेत तपास करून पिडीत व्यक्तीला न्याय द्यावा, अशी अपेक्षा व्यक्त केली जात आहे.
पिंपरी-चिंचवडसाठी स्वतंत्र आयुक्तालय कार्यान्वित झाल्यापासून वरिष्ठ अधिकाऱ्यांसह ठाण्यातील कर्मचाऱ्यांचीही संख्या वाढली. यासह गुन्हे शाखेचे पाच युनिट, खंडणीविरोधी पथक, दरोडाविरोधी पथक, आर्थिक गुन्हे शाखा आदी पथके अस्तित्वात आली. यामुळे एखादा गुन्हा दाखल घडल्यानंतर त्याचा तातडीने तपास होईल, अशी अपेक्षा व्यक्त केली जात होती. मात्र, ही बाब केवळ गंभीर गुन्ह्यांबाबतच घडत आहे, तर इतर गुन्हे केवळ दाखल करण्यापुरतेच मर्यादित राहत आहेत. पीडित व्यक्ती ठाण्यात हेलपाटे मारून हैराण होते. तपास सुरू आहे, अशीच उत्तरे मिळतात.

तपासाला वेग यावा
आयुक्तालयात सध्या एक पोलिस आयुक्त, एक सहपोलिस आयुक्त, एक अतिरिक्त आयुक्त, सहा उपायुक्त, नऊ सहायक आयुक्त तसेच तीन हजारांपेक्षा अधिक अधिकारी, कर्मचारी उपलब्ध आहेत. तसेच २३ पोलिस ठाणी कार्यान्वित आहेत. यांसह गुन्हे शाखा, खंडणी विरोधी पथक, अमली पदार्थ विरोधी पथक, आर्थिक गुन्हे शाखा आदी विभाग आहेत. त्यामुळे अशी सर्व यंत्रणा असताना गुन्ह्याच्या तपासाला वेग यावा, अशी अपेक्षा व्यक्त केली जात आहे.

अशी आहे स्थिती
चालू वर्षात जानेवारी ते जून या सहा महिन्यांत विविध पोलिस ठाण्यांमध्ये दाखल झालेल्या गुन्ह्यांपैकी खुनाचे गुन्हे उघडकीस येण्याची टक्केवारी ९७ टक्के, खुनाचा प्रयत्नाचा गुन्हा उघड होण्याचे प्रमाण १०० टक्के तर जबरी चोरीचा गुन्हा उघडकीस येण्याचे प्रमाण ८३ टक्के आहे. ही चांगली बाब आहे. मात्र, घरफोडीचे गुन्हे उघडकीस येण्याची टक्केवारी अवघी ३८ टक्के तर वाहन चोरीचे गुन्हे उघडकीस येण्याचे प्रमाण अवघे ३२ टक्के असल्याचे दिसून येते. तर फसवणुकीचे गुन्हे उघडकीस येण्याचे प्रमाण ६२ टक्के आहे.

गुन्ह्यांसंबंधी आकडेवारी (१ जानेवारी ते ३० जून २०२५)
गुन्हा दाखल उघड उघड टक्केवारी
घरफोडी १२८ ४९ ३८
वाहन चोरी ४३६ १३९ ३२
जबरी चोरी १०२ ८५ ८३
फसवणूक २२४ १३८ ६२
खून ३२ ३१ ९७
खुनाचा प्रयत्न ९३ ९३ १००
---