वैद्यकीयदृष्ट्या ‘स्ट्राँग’; मनुष्यबळाची ‘मात्रा’ वाढावी

पीतांबर लोहार : सकाळ वृत्तसेवा
पिंपरी, ता. २१ : आरोग्य सेवा आयुक्तालयाने राज्यातील सर्व महापालिकांच्या आरोग्य सेवांचे गेल्या वर्षी सर्वेक्षण केले. यात बालकांचे आरोग्य, कुटुंब नियोजन यांसह डेंगी, एचआयव्ही आणि इतर आजारांच्या निर्मूलनाचे कार्यक्रम राबविणे, महापालिकेकडून वैद्यकीय सेवेसाठी वित्तपुरवठा, रुग्णालये व दवाखान्यांत उपचार सेवा आदी निर्देशांकानुसार वर्गीकरण करून गुण दिले. त्यात पिंपरी-चिंचवड महापालिकेच्या वैद्यकीय विभागाने राज्यात द्वितीय स्थान पटकावले. त्या पार्श्‍वभूमीवर ‘सकाळ’ने सोमवारी (ता. २१) सकाळी दहा ते अकरा या वेळेत महापालिकेची आठ रुग्णालये व महत्त्वाच्या १० दवाखान्यांत ‘स्टिंग’ केले. त्यातून रुग्णालये व दवाखाने उपचारांसाठी वैद्यकीयदृष्ट्या ‘स्ट्राँग’ असल्याचे आढळून आले. रुग्ण व नातेवाइकांचा प्रतिसादही बराचसा ‘पॉझिटिव्ह’ आला. ओपीडी, केसपेपर, औषध वाटप, तपासणी आदी भागात रांगा आढळून आल्या. त्यातून रुग्ण व नातेवाइकांची आरोग्य यंत्रणेवरील विश्‍वासाहर्ता अधोरेखित झाली. मात्र, बहुतांश ठिकाणी मनुष्यबळ कमी असल्याचे जाणवले. रुग्णसेवेचा दर्जा व विश्‍वासार्हता अशीच कायम ठेवण्यासाठी ‘मनुष्यबळाची मात्रा’ वाढवायला हवी, असेही यावेळी दिसले.

अशी आहे वैद्यकीस सेवा
‘वायसीएम’सह (यशवंतराव चव्हाण पदव्यूत्तर पदवी संस्था) आठ रुग्णालये, एक नेत्र रुग्णालय, ३० दवाखाने, ३५ नागरी आरोग्यवर्धिनी मंदिर (जिजाऊ क्लिनिक) आणि हिंदूहृदयसम्राट बाळासाहेब ठाकरे आपला दवाखाना, या माध्यमांतून वैद्यकीय सेवा-सुविधा महापालिका देत आहे.

आरोग्यवर्धिनी मंदिराची रचना
आरोग्यवर्धिनी मंदिरामध्ये केस पेपर नोंदणी, बाह्यरुग्ण विभाग, इंजेक्शन व ड्रेसिंग रूम, प्रयोगशाळा विभाग, औषध वाटप, नियमित लसीकरण कक्ष, वेलनेस ॲक्टिव्हिटी रूम आदी सुविधा आहेत. कंपन्यांच्या ‘सीएसआर’ निधीचा उपयोगातून आरोग्यवर्धिनी मंदिरांची उभारणी केली जात आहे.

भविष्यातील वैद्यकीय सुविधा
- मोशीत ७५० खाटांचे रुग्णालय व वैद्यकीय महाविद्यालय मंजूर.
- चिंचवडमध्ये जुन्या तालेरा रुग्णालयात ३० खाटांचा जळित रुग्ण कक्ष (बर्न वॉर्ड) असेल, त्यात १२ खाटा आयसीयू.
- नवीन थेरगाव रुग्णालयाशेजारी ६० खाटांचे कर्करोग निदान रुग्णालय प्रस्तावित, भविष्यात १०० खाटांचे नियोजन.
- घराजवळच वैद्यकीय सुविधांसाठी ठिकठिकाणी आरोग्यवर्धिनी मंदिर (जिजाऊ क्लिनिक), हिंदूहृदयसम्राट बाळासाहेब ठाकरे आपला दवाखाना.

महापालिकेची उद्दिष्ट्ये
- नागरिकांना उत्तम दर्जाची वैद्यकीय सुविधा माफक दरात उपलब्ध व्हावी
- गरीब रुग्णांना मोफत व दर्जेदार वैद्यकीय उपचार मिळावेत
- नवीन भोसरी, नवीन जिजामाता, नवीन थेरगाव, आकुर्डी रुग्णालय सुरू केले
- ‘वायसीएम’सह नवीन पाच रुग्णालयांत ऑक्सिजन निर्मिती यंत्रणा

सद्यस्थितीतील वैद्यकीय सुविधा
आरोग्य शिबिरे, मोफत औषधे, शस्त्रक्रिया, लसीकरण, मोफत तपासणी, आपत्कालीन सेवा, स्वतंत्र नेत्र रुग्णालय

महापालिका रुग्णालयांत बाह्यरुग्ण विभागाचा आलेख (जुलै २०२४ ते जून २०२५)
शहरातील : १२,५०,११४
शहराबाहेरील : ५,३६,१०५
एकूण रुग्ण : १७,८६,२१९

रुग्णालयांच्या खाटांची क्षमता
रुग्णालय / खाटा
वायसीएम / ७५०
नवीन थेरगाव / ३४०
नवीन जिजामाता / १२०
नवीन भोसरी / १००
आकुर्डी / १३०
तालेरा / ५०
सांगवी / १६
यमुनानगर / १८
नेत्र रुग्णालय / ७०
एकूण / १,५९४
(तालेरा रुग्णालयातील खाटांची क्षमता २५० पर्यंत वाढविण्याचे नियोजन)

‘वायसीएम’सह महापालिकेची आठ रुग्णालये, दवाखाने, आरोग्यवर्धिनी मंदिर कार्यान्वित आहेत. त्यांद्वारे उत्तम दर्जाच्या वैद्यकीय सुविधा माफक दरात देण्यासाठी डॉक्टर व कर्मचारी प्रयत्नशील आहेत. या सुविधांमध्ये आवश्यकतेनुसार वाढ करण्याचे नियोजन आहे.
- डॉ. लक्ष्मण गोफणे, आरोग्य वैद्यकीय अधिकारी, महापालिका