ट्रकच्या धडकेत तरुण गंभीर जखमी

पिंपरी : सिमेंट मिक्सर ट्रकने दुचाकीला जोरदार धडक दिल्याने दुचाकीवरील तरुण गंभीर जखमी झाला. ही घटना तळवडेतील त्रिवेणीनगर चौक येथे घडली. सोहम श्रीराम नाईक असे या अपघातात जखमी झालेल्‍या दुचाकीस्‍वार तरुणाचे नाव आहे. या प्रकरणी त्‍याचे वडील श्रीराम वसंत नाईक (रा. कृष्णानगर, चिंचवड) यांनी चिखली पोलिस ठाण्‍यात फिर्याद दिली आहे. त्यानुसार पोलिसांनी ट्रकवरील अज्ञात चालकावर गुन्‍हा दाखल केला आहे. सोहम नाईक हा दुचाकीवरून जात होता. तो त्रिवेणीनगर चौकाजवळ आला असता एका सिमेंट मिक्सर ट्रकने त्‍यास डाव्या बाजूने जोरात धडक दिली. या धडकेत सोहमच्या डाव्या पायाला गंभीर दुखापत झाली. ट्रक चालक अपघातानंतर घटनास्थळावरून पसार झाला.

पिस्तूल बाळगल्याप्रकरणी तरुणाला अटक
पिंपरी : बेकायदारित्या पिस्‍तूल बाळगणाऱ्या एका तरुणाला पिंपरी पोलिसांनी अटक केली. ही कारवाई पिंपरीतील शेवाळे सेंटरजवळ करण्‍यात आली. ओंकार उर्फ अण्णा बाळू हजारे (वय २३, रा. मोरया हाउसिंग सोसायटी, वेताळनगर, चिंचवड) असे अटक केलेल्‍या आरोपीचे नाव आहे. आरोपी ओंकार हजारे याच्याकडे पिस्तूल असल्‍याची माहिती पोलिसांना मिळाली. त्‍यानुसार पोलिसांनी सापळा रचून त्‍याला ताब्‍यात घेतले. त्‍याच्‍याकडून एक पिस्तूल व एक जिवंत काडतूस असा एकूण ५० हजार ५०० रुपयांचा मुद्देमाल जप्‍त केला.
---