गुन्हे वृत्त

व्यवसायाच्या नावे १८ लाखांची फसवणूक

पिंपरी : घरबसल्या व्यवसाय आणि उत्पन्नाचे आमिष दाखवून नागरिकांची १८ लाख सहा हजार रुपयांची फसवणूक केली. ही घटना शंकर कलाटेनगर येथे घडली. या प्रकरणी एका महिलेने वाकड पोलिसांत फिर्याद दिली आहे. त्यानुसार पोलिसांनी सुशांत सुभाष पाटील (वय ४०), एक महिला (वय ३८), अभय देवा (वय ४०, तिघे रा. अष्टे, ता. वाळवा, जि. सांगली), मनदीपसिंग (वय ३८, रा. काळेवाडी, पुणे) आणि एक महिला (वय ३०, रा. सुखवानी व्‍हिला, चिंचवडगाव) यांच्यावर गुन्हा दाखल केला आहे. आरोपींनी ‘वर्ल्ड वाइड ॲग्रो बिझ प्रा. लि.’ या नावाने यूट्यूब चॅनेलवर प्रसिद्धी केली. त्यांनी घरबसल्या व्यवसाय आणि मासिक उत्पन्नाचे आमिष दाखवून पैसे गुंतवण्यास भाग पाडले. त्यानुसार फिर्यादी आणि इतरांनी आरोपींकडे गुंतवणूक केली. पण, आरोपींनी परतावा दिला नाही.

श्वान चावल्याने महिलेला मारहाण
पिंपरी : श्वान चावल्याच्या कारणावरून झालेल्या वादातून महिलेला मारहाण करण्यात आली. तसेच वस्तीतून निघून जाण्याबाबत धमकी दिली. ही घटना दापोडीतील काटे वस्तीत घडली. महिलेच्या फिर्यादीनुसार, पोलिसांनी चार महिलांवर गुन्हा दाखल केला आहे. फिर्यादी घरी असताना वस्तीतील महिलेने त्यांना बाहेर बोलावले. महिलेच्‍या पतीला श्वान चावल्याचे कारण देत फिर्यादीशी भांडण सुरू केले. त्यावर फिर्यादीची घरमालकीण तसेच आई व बहीण तिथे आल्या आणि त्यांनीही श्वानाच्या त्रासामुळे फिर्यादीला शिवीगाळ केली. या वादादरम्यान, फिर्यादीच्या आईने काठीने फिर्यादीच्या डोक्यात मारून जखमी केले. तसेच सर्वांनी फिर्यादीला वस्तीतून निघून जाण्याची धमकी दिली.

रहाटणीत तरुणावर चाकूने वार
पिंपरी : जुन्या भांडणातून एका तरुणावर चाकू हल्ला करण्यात आला. ही घटना रहाटणी येथे घडली.
या प्रकरणी कुंदन वाघ (रा. नखातेवस्ती, रहाटणी) यांनी काळेवाडी पोलिसांत फिर्याद दिली आहे. त्यानुसार पोलिसांनी सौरभ (रहाटणी) आणि त्याचा एक साथीदार यांच्यावर गुन्हा दाखल केला आहे. फिर्यादी आणि त्यांचा मित्र सचिन सगर (रा. नखातेवस्ती, रहाटणी) हे घरी जात होते. त्‍यावेळी फिर्यादींच्या ओळखीचा आरोपी त्यांच्यामागून साथीदारासह आला. आरोपीला पूर्वी भांडण करताना फिर्यादीने पकडले होते. त्या रागातून त्याने फिर्यादीला थांबवून मारहाण केली. फिर्यादी आणि त्यांचा मित्र समजावून सांगत असतानाही मारहाण सुरूच ठेवली. तसेच चाकूने फिर्यादीच्या उजव्या हातावर वार करून जखमी केले.

मारहाणप्रकरणी दाम्पत्यावर गुन्हा

पिंपरी : सुरक्षा सुपरवायझरला मारहाण केल्याप्रकरणी दाम्पत्‍यावर गुन्हा दाखल झाला आहे. ही घटना ताथवडे येथील कोहिनूर सफायर-२ या सोसायटीत घडली. महेश शिंदे (वय ५३, रा. अशोका हौसिंग सोसायटी, काळेवाडी फाटा, थेरगाव) असे जखमीचे नाव आहे. त्‍यांनी वाकड पोलिस ठाण्‍यात फिर्याद दिली आहे. त्यानुसार पोलिसांनी व्यंकटेश मराठे आणि त्‍याची पत्‍नी यांच्यावर गुन्हा दाखल केला आहे. फिर्यादी हे सोसायटीतील क्लब हाऊस येथे फेरी मारत होते. त्‍यावेळी ‘‘रात्री फोनवर तूच होतास ना?’’ असे म्हणत महिलेने पाइपने फिर्यादीला मारून जखमी केले. तसेच, व्यंकटेश याने लाथाबुक्क्यांनी मारहाण केली.

अपघातात दुचाकीस्वाराचा मृत्यू
पिंपरी : दुचाकीच्या अपघातात तरुणाचा मृत्यू झाला. ही घटना बाणेर परिसरात महामार्गावर घडली.
गणेश तानाजी धांडे (वय २०, नागसेन नगर, चिंचवड) असे या अपघातात मृत्यू झालेल्या दुचाकीस्‍वार तरुणाचे नाव आहे. गणेश हे त्यांच्या दुचाकीवरून जात असताना अपघात झाला. या अपघातात त्यांचा मृत्यू झाला.