संवाद माझा

तळेगावमधील बसथांब्यापाशी कोंडी
तळेगाव-चाकण महामार्गावरील तळेगाव स्टेशन येथील मराठा क्रांती चौकात ‘पीएमपीएमएल’चा बस थांबा आहे. कामगार, विद्यार्थी आणि नागरिकांना चाकण, माळवाडी, इंदुरी, देहूगाव, भोसरी येथे जाण्यासाठी बसची व्यवस्था आहे. याच चौकात रिक्षा अनधिकृत ठिकाणी थांबतात. बाजूला अनेक फलक अनधिकृतरीत्या रस्त्यावरच लावले जातात. त्यामुळे बस भर चौकात थांबविणे भाग पडते. परिणामी वाहतूक कोंडी होते. याच ठिकाणी अनेक अपघात झाले आहेत. काही जणांना आपले प्राण गमवावे लागले आहेत. डावे वळण मोकळे असायला हवे. बसथांब्याच्या दोन्ही बाजूंना १०० मीटर परिसरात इतर कोणतीही वाहने उभी राहण्यास प्रतिबंध असतो. या नियमांचे पालन व्हायला हवे. त्यासाठी तळेगाव दाभाडे वाहतूक पोलिस शाखा व नगरपालिका प्रशासनाने सकारात्मक उपाययोजना कराव्यात.
- दिलीप डोळस, तळेगाव
PNE25V33482
-----

तुटलेले चेंबर दुरुस्त करा

चापेकर चौकातून जकातनाक्याकडे जाताना वाटेत शांतीबन सोसायटीजवळ मोठे चेंबर तुटले आहे. वर्दळीचा विचार करता केव्हाही गंभीर अपघात होऊ शकतो. त्यामुळे महापालिकेने चेंबरची लवकर दुरुस्ती करावी.
- रमेश पाटील, चिंचवड
PNE25V32833
---
गणपती मंदिराजवळच कचरा

रावेतमधील शिंदे वस्ती चौकातील गणपती मंदिराजवळील कचरा पडून असतो. तो कधीही उचलला जात नाही. अनेक बेजबाबदार नागरिक पदपथावरच कचरा टाकून जातात. शेजारी विद्येची देवता असलेल्या गणपतीचे मंदिर त्यांना दिसत नाही का, असा प्रश्न पडतो. येथे ‘पीएमपीएमएल’ बस क्रमांक ३०७ चा थांबा आहे. चेंबरची जुनी गंजलेली जाळी तिथेच पडून आहे. याच सदरात दाद मागितल्यानंतर तेथील पदपथावर वाहने दिसत नाहीत. त्याप्रमाणे कचऱ्याचा प्रश्नही सुटावा हीच अपेक्षा.
- श्रीनिवास ढोंगडे, रावेत
PNE25V32836
---
दोन वर्षांत रस्त्यावर खड्डे

आकुर्डी स्थानकासमोरील गुरुद्वारा चौकाकडील रस्ता बांधून फक्त दोन वर्षे झाली आहेत, पण त्यावर खड्डे झाले आहेत. संबंधितांनी याची तत्काळ दुरुस्त करावी. या अडचणीमुळे कोंडी, अपघात होतात. अशा कामांसाठी ठेकेदाराकडून कोणतीही हमी घेतली जात नाही का, किती वर्षे दुरुस्ती करावी लागणार नाही असे प्रश्न प्रशासनाला पडत नाहीत का...
- विनय मोने, वाल्हेकरवाडी, प्राधिकरण
PNE25V32835
--
झाडांमुळे पुलाला धोका
पिंपळे निलख येथील भारतरत्न डॉ. बाबासाहेब आंबेडकर पूल हा बाणेर आणि बालेवाडीस जोडणारा आहे. या पुलावरील दुभाजकांमध्ये झाडे लावून सुशोभीकरण करण्यात आले आहे. त्याची देखभालही उत्तम होत आहे, पण दोन प्रकारची झाडे आकाराने मोठी व उंच वाढणारी आहेत. ती लावल्याने भविष्यात या झाडांच्या मुळांमुळे पुलाला धोका निर्माण होण्याची शक्यता आहे. तरी महापालिकेच्या ‘ड’ प्रभाग क्षेत्रीय कार्यालयाने ही झाडे दुसरीकडे स्थलांतरित करावीत.
- सनी शिंदे, पिंपळे निलख
PNE25V33483
---