हिंजवडीत ‘एमआयडीसी’च्या कारवाईला वेग

पिंपरी, ता. २३ ः हिंजवडीत महाराष्ट्र औद्योगिक विकास महामंडळाच्या (एमआयडीसी) अतिक्रमण विरोधी कारवाईला वेग आला आहे. गेल्या पंधरवड्यात ५३ अतिक्रमणे हटविण्यात आली.
नालेसफाईसाठी तसेच राडारोडा काढण्याचेही काम हाती घेण्यात आले आहे. ‘एमआयडीसी’ क्षेत्रातील जवळपास सर्वच अतिक्रमणे काढण्यात आली आहेत. ‘पीएमआरडीए’ व ‘एमआयडीसी’ क्षेत्रातील नाल्यांचा प्रवाह सुरळीत करण्यासाठी संस्थेची नेमणूक केल्याचेही सांगण्यात आले.
५३ अतिक्रमणांवर कारवाई
हिंजवडीतील राजीव गांधी आयटी पार्कमधील फेज १ मधील १२ , फेज २ मधील चार, तर फेज ३ मधील ३७ अतिक्रमणांवर कारवाई करण्यात आली. खासदार सुप्रिया सुळे यांनी चार जुलै रोजी हिंजवडीतील अतिक्रमणे काढून नालेसफाई करण्याची मागणी केली होती. २५ जुलैपर्यंत हे काम झाले नाही तर २६ जुलैला हिंजवडीत आंदोलन करण्याचा इशाराही त्यांनी प्रशासकीय यंत्रणांना दिला होता. त्यानंतर ‘पीएमआरडीए’ व ‘एमआयडीसी’ ही कारवाई केली आहे.

संस्थेची नेमणूक
बुजलेल्या नाल्यांमधील राडारोडा काढण्यासोबतच ‘स्ट्रॉर्म वॉटर ड्रेनेज सिस्टीम’ कार्यान्वित करण्यासाठी ‘एमआयडीसी’ संस्थेची नेमणूक केली. या संस्थेद्वारे या भागातील नाले पूर्ववत करण्यासाठी कराव्या लागणाऱ्या उपाययोजनांबाबत अहवाल दिला जाईल. त्यानुसार या भागातील नैसर्गिक ओढे मुळा नदीपर्यंत विनाअडथळा पोचावेत यासाठी ‘पीएमआरडीए’ व ‘एमआयडीसी’ यांच्याकडून संयुक्तरित्या कार्यवाही करण्यात येईल. सध्या बुजवलेले नाले सुरु करण्यासोबतच भविष्यात जलकोंडी होऊ नये यासाठी उपाययोजना लवकरच करण्यात येतील, असे ‘एमआयडीसी’तर्फे सांगण्यात आले.
---
हिंजवडीतील औद्योगिक क्षेत्रातील पदपथांवर असणाऱ्या सर्व टपऱ्या काढण्यात आल्या आहेत. इतर अतिक्रमणांवरही कारवाई केली जात आहे. नालेसफाई करण्यासोबतच ‘स्ट्रॉर्म वॉटर ड्रेनेज सिस्टिम’ उभारण्यासाठी संस्था नेमण्यात आली आहे. त्यांचा अहवाल लवकरच येईल. त्यानुसार दीर्घकालीन उपाययोजना करण्यात येणार आहेत.
- नितीन वानखेडे, मुख्य अभियंता, ‘एमआयडीसी’
-----